Një përkëdhelje, një përqafim apo edhe lëvizja më e vogël që përfshin prekjen mund të sjellë përfitime të rëndësishme për shëndetin tonë mendor dhe fizik, sipas një studimi të ri. Prekja është shqisa e parë që zhvillohet në trupin tonë, pasi është thelbësore për t’u përshtatur me ndryshimet në mjedis, por edhe për të komunikuar me të tjerët. Dhe ndërsa ka shumë studime që kanë treguar se prekja është e dobishme për mirëqenien tonë, një përqindje e vogël e tyre kanë mbledhur gjetjet.
Tani, një studim i ri i botuar në revistën Nature Human Behavior mblodhi 212 studime të botuara dhe analizoi 85 studime që përfshinin të rriturit dhe 52 që fokusoheshin tek të porsalindurit. Sipas Guardian, rezultatet treguan se prekja ishte po aq e dobishme për shëndetin mendor dhe fizik, me një ndikim më të madh në pjesë të caktuara të trupit. Dr. Elena Hartmann, një nga autoret e studimit nga Spitali Universitar Essen, tha: “Më shumë kontakte konsensuale përmes prekjes gjatë ditës sonë mund të ndihmojnë në zbutjen e problemeve mendore dhe fizike”.
Ndërkohë, studiuesit e tjerë raportuan se “puna jonë tregon se ndërhyrjet me prekje janë më të përshtatshme për reduktimin e dhimbjes, depresionit dhe ankthit tek të rriturit dhe fëmijët, si dhe shtimi në peshë tek të sapolindurit“. Një nga gjetjet më “të çuditshme”, megjithatë, është se njerëzit korrin përfitime të ngjashme për sa i përket shëndetit të tyre fizik, edhe kur preken nga objekte të tilla si batanijet.
Cilët njerëz kanë përfitimet më të mëdha të prekjes?
Ndër rezultatet e tjera, studiuesit arritën në përfundimin se prekja ishte e dobishme si për njerëzit e shëndetshëm ashtu edhe për ata jo të shëndetshëm, megjithëse ndikimi ishte më i madh tek këta të fundit për sa i përket përfitimeve të shëndetit mendor. Megjithatë, prekja e kokës shoqërohej me përfitime më të mëdha shëndetësore sesa prekja e pjesëve të tjera të trupit.
Sipas informacionit të Guardian, profesoresha Katerina Fotopoulou, nga University College London, tha se hulumtimi në thelb jep një vështrim të parë në përfitimet shëndetësore të prekjes. Ajo, megjithatë, theksoi se studimi nuk mund të ofrojë përfundime më specifike, por mund të nxisë një punë të re në fushën specifike./abcnews.al
