Një incident ka ndodhur në Rusi, duke lënë mjekët me gojë hapur. Gjatë një kontrolli, ata vunë re se një e moshuar kishte në trurin e saj një gjilpërë metalike.
80-vjeçarja nga rajoni Sakhalin i Rusisë së fundmi iu nënshtrua një skanimi CT, i cili bëri zbulim shokues. Skanimi zbuloi një gjilpërë metalike 3 cm të ngulitur fort në anën e majtë të trurit të saj.
Fotot e rezultateve të skanimit të CT të së moshuarës, të publikuara nga Ministria e Shëndetësisë e Sakhalin, u shoqëruan me një shpjegim po aq tronditës. Duke pasur parasysh moshën e madhe të gruas, mjekët dolën në një përfundim befasues, gjilpëra me sa duket u fut në trurin e saj nga vetë prindërit e saj menjëherë pasi lindi.
Arsyeja e këtij akti të paimagjinueshëm ishin kushtet e dëshpëruara me të cilat përballeshin shumë familje në Rusinë e shkatërruar nga lufta. Në situata të tilla tragjike, prindërit në pamundësi për t’u kujdesur për të porsalindurit e tyre iu drejtuan një praktike të tmerrshme: futjes së gjilpërave të holla përmes fontanelës, hendekut në kafkën e një foshnjeje që mbyllet përfundimisht ndërsa rritet, për t’i dhënë fund jetës së fëmijëve të tyre.
Ministria e Shëndetësisë shpjegoi: “Raste të tilla gjatë viteve të urisë nuk ishin të rralla: një gjilpërë e hollë u fut në fontanelën e foshnjës, e cila shkaktoi dëmtime në tru. Kështu, ata fshihnin gjurmët e krimit dhe foshnja vdiste”.
Profesionistët mjekësorë zgjodhën të mos operonin për shkak të moshës së madhe të pacientes, duke e konsideruar atë shumë të rrezikshme. Për fat të mirë, ata e siguruan se gjilpëra nuk përbënte asnjë kërcënim të menjëhershëm për shëndetin e saj./abcnews.al
