Hipertensioni shkak kryesor për sëmundjet e zemrës në Shqipëri, 1 në 5 persona s’e dinë që e kanë

schedule15:06 - 23 Shtator, 2020

schedule 15:06 - 23 Shtator, 2020

Rreth 40% e moshës mbi 25 vjeç në Shqipëri vuajnë nga tensioni i lartë i gjakut.

Të dhënat deklarohen nga mjekja Kardiologe në Spitalin Hygeia në Tiranë Jorida Djamandi e cila  tregon gjithashtu se 1 në 5 persona nuk e dinë që vuajnë nga hipertensioni dhe mësojnë për sëmundjen kur shëndeti iu përkeqësohet.

“Ata që vuajnë nga hipertensioni shpesh herë nuk e kontrollojnë mirë atë dhe 70 % e tyre nuk arrijnë të kenë vlerat normale. Mund të ndodhë që pacienti të paraqitet me infarkt miokardi ose me insult cerebrale dhe aty kupton që ka vuajtur nga sëmundja e hipertensionit”, thotë ajo.

Pikërisht për këtë arsye tensioni i lartë i gjakut quhet cilësohet dhe si vrasës i heshtur. Ai është shkak kryesor për sëmundjet kardiovaskulare.  Prandaj mjekja kardiologe në Spitalin Hygeia në Tiranë Jorida Djamandi apelon për kontroll periodik të tensionit dhe konsulta me specialistin.

“Matja e tensionit duhet të bëhet ulur, i qetë. Duhet të bëhen dy ose tre matje njëra pas tjetrës dhe të merret një mesatare e tyre. E rëndësishme është që cdo pacient mbi 25 vjeç të bëjë herë pas here kontrolle periodike tek mjeku.

Në rast se shohin se vlerat e tij janë mbi 140 me 90, saç është pragu maksimal i hipertensionit, duhet të bëjnë kontroll tek mjeku i familjes i cili mund të këshilloj vizitë më të detajuar tek mjeku specialist”, këshillon mjekja.

Personat që vuajnë nga hipertensioni sipas mjekes duhet të kufizojnë përdorimin e kripës, yndyrna shtazore dhe të mbajnë një dietë të ekuilibruar ushqimore./abcnews.al