Kryeministri i Kosovës, Ramush Haradinaj ka vizituar të hënën ambjentet e kompanisë “New Co Ferronikeli”, eksportuesja më e madhe dhe me numrin më të lartë të punonjësve në Kosovë.
Gjatë vizitës, Haradinaj i ka shprehur mirënjohjen e tij aksionerit kryesor të kompanisë, Samir Mane, si dhe Balfin Grup, për investimin në këtë aset me rëndësi strategjike për Kosovën. gjatë vizitës, Haradinaj është njohur me ecurinë e rivendosjes së prodhimit përgjatë këtyre muajve, mundësinë e rritjes së kapaciteteve prodhuese dhe për planin e ardhshëm operacional.
“Investitorët në Kosovë kanë partner të përhershëm qeverinë, e cila do të jetë gjithmonë përkrah tyre në rrugëtimin drejt zhvillimit dhe avancimit në tregun e brendshëm dhe ndërkombëtar”, ka deklaruar Haradinaj.
Kompania “New Co Ferronikeli” angazhon në radhët e saj 800 punëtorë dhe 400 kontraktorë dhe luan një rol kyç në zhvillimin e ekonomisë së Kosovës./abcnews.al
