Ramush Haradinaj e ka përjashtuar opsionin e një aleance me PDK-në dhe LDK-në në zgjedhjet e ardhshme. Haradinaj ka deklaruar se për qeverisjen e ardhshme do të vendosë në radhë të parë sovrani dhe ka shtuar se, nëse rizgjidhet kryeministër nuk do ta heqë taksën me Serbinë.
Kryeministri i dorëhequr i Kosovës, Ramush Haradinaj e ka përjashtuar pjesëmarrjen e AAK-së në një koalicion gjithëpërfshirës në zgjedhjet e ardhshme. Në një intervistë televizive, Haradinaj ka nënvizuar se AAK nuk do të bëjë aleancë me partitë e mëdha si PDK dhe LDK dhe nuk do ta përkrahë idenë për një kryeministër konsensual.
“Nuk jemi për koalicion me PDK-në, LDK-në dhe VV-në, por jemi të hapur për disa parti partnere siç është rasti i PSD-së, AKR-së…”, tha Haradinaj.
Haradinaj ka nënvizuar se AAK do t’u ofrohet fillimisht qytetarëve si parti më vete, pasi sipas tij ajo është rritur si subjekt politik dhe në sondazhe rezulton e para.
“Qytetari ka vlerësuar angazhimin tim në temat kombëtare dhe për këtë Aleanca është rritur. Jemi në situatën e fitores”, tha ai.
Sa i takon kandidaturës së tij për postin e kryeministrit, Haradinaj ka theksuar se ajo do të diskutohet në strukturat e AAK-së.
“Nuk e kemi konfirmuar si parti kandidaturën time, do ta diskutojmë për ta konfirmuar. Ekziston kandidatura ime, por duhet ta zyrtarizojmë. Por e rëndësishme është se kush do të jetë kryetar qeverie nuk e vendosin vetëm partitë, por edhe qytetarët me votë dhe është herët të thuhet se si do të ndodhë”, tha Haradinaj.
Sa i takon taksës për produktet serbe, Haradinaj ka deklaruar se nuk do ta mbështesë heqjen e saj, pasi sipas tij është në interes të shtetësisë së Kosovës.
“Asnjë parti nuk do të marrë mbështetjen tonë për heqjen e taksës. Taksa është shtet. Një shtet që rrezikohet nga tjetri dhe i hap tregun, atëherë nuk është shtet”, deklaroi Haradinaj.
Haradinaj ka shtuar më tej se, për aq kohë sa çështja e shtetësisë së Kosovës nuk është zgjidhur 100 për qind është me rrezik që ajo të udhëhiqet nga liderë të paqëndrueshëm, që bëjnë sipas tij kompromise për hir të familjes dhe rrethit të afërt në kurriz të vendit./ABC News Albania 24/7
