Pas një muaji hetim Policia e Vlorës ka arritur të identifikojë një të mitur, i cili dyshohet për ndërhyrje të paautorizuar në sistemin kompjuterik të disa institucioneve shtetërore.
“Finalizohet operacioni “The Accountant”, goditet një rast i ndërhyrjes së paautorizuar në sistemet kompjuterike të disa institucioneve shtetërore. Identifikohet, pas një hetimi 1-mujor me metoda speciale, dhe vihet në hetim një i mitur si autor i dyshuar”, shkruhet në njoftimin e policisë.
15-vjeçari kishte hyrë në të dhënat e e-maileve dhe faqeve zyrtare të institucioneve, duke shkaktuar ndërprerjen e funksionimit të tyre për periudha të caktuara kohore. Nga hetimet e deritanishme nuk ka rezultuar vjedhje të të dhënave apo dokumenteve konfidenciale nga këto sisteme.
Gjatë operacionit policia sekuestroi disa pajisje, të cilat do t’i nënshtrohen ekzaminimeve të thelluara teknike./abcnews.al
