Dëmtimi në fushë dhe zëvendësimi në minutën e 61-të në sfidën çerekfinale të Kupës së Federatës nuk u duk shqetësues. Por pamjet që qarkulluan pas sfidës, ku Erling Haland linte stadiumin me paterica ngritën nivelin e alarmit.
Por, frika më e madhe e Manchester City dhe tifozëve të tij u konfirmua, pas testeve të specializuara mjekësore.
Sulmuesi norvegjez ka pësuar një dëmtim në kaviljen e djathtë, ndërsa sezoni i tij është praktikisht I përfunduar përpara kohe.
Në rastin më të mirë, Haland mund të kthehet vetëm në javën e fundit të Premier League, në program më 26 maj, ndërsa City kërkon ta ketë gati futbollistin për Botërorin e Klubeve që do të nisë më 14 qershor.
Gjithsesi, sipas njoftimit zyrtar të shpërndarë nga klubi anglez, ecuria e rikuperimit të Erling Haland do të monitorhet, ndërsa pas disa ditësh, ai do t’I nënshtrohet të tjera testeve që mund të përcaktojnë më saktë periudhën e rikuperimit.
E sigurtë është që Manchester City dhe Guardiola duhet të bëjnë pa shërbimet e sulmuesit kryesor deri në fund të këtij sezoni.
Një humbje e rëndë për Guardiolën dhe skuadrën e tij, që në Premier League kanë objektiv sigurimin e një bilete në Champions, ndërsa trofeu I vetëm i mbetur në lojë është Kupa e Federatës./abcnews.al
