Loading ...
Greqia po planifikon të zgjerojë më tej ujërat e saj territoriale, përfshirë edhe zona të mundshme në Detin Egje, pavarësisht kërcënimit të hershëm të Turqisë për luftë nëse Athina ndërmerr një hap të tillë.
Dy vendet, aleatë në NATO por rivalë historikë, kanë ulur tensionet vitet e fundit, megjithatë vazhdojnë të kenë mosmarrëveshje mbi kufijtë e shelfit kontinental në Detin Egje – një zonë që besohet se ka potencial të konsiderueshëm energjetik dhe që ndikon edhe në çështjet e hapësirës ajrore dhe fluturimeve.
Greqia ka zgjeruar tashmë ujërat e saj territoriale në Detin Jon në 12 milje detare nga 6, pas marrëveshjeve me Italinë, si dhe ka nënshkruar një marrëveshje për delimitimin detar me Egjiptin në Mesdheun lindor. Megjithatë, Athina ka shmangur deri tani veprime të ngjashme në Detin Egje, për shkak të kundërshtimit të fortë të Ankarasë.
Në vitin 1995, parlamenti turk shpalli një casus belli (shkak për luftë) në rast se Greqia zgjeron në mënyrë të njëanshme ujërat e saj territoriale përtej 6 miljeve detare në Detin Egje, një qëndrim që Athina thotë se bie ndesh me të drejtën ndërkombëtare detare.
Duke iu përgjigjur pyetjeve në parlament, Gerapetritis tha se zgjerimi i mëtejshëm është i pritshëm.
“Sot, sovraniteti ynë në Detin Egje shtrihet në gjashtë milje detare. Ashtu siç pati marrëveshje me Egjiptin dhe Italinë, do të ketë edhe një zgjerim të mëtejshëm të ujërave territoriale,” deklaroi ai, pa specifikuar zonat konkrete që mund të përfshihen.
Ministria e Jashtme e Turqisë nuk reagoi menjëherë ndaj deklaratave.
Në korrik, Greqia hodhi një tjetër hap duke shpallur kufijtë e dy parqeve të reja detare në Detin Jon dhe në Detin Egje. Parku në Egje, me një sipërfaqe prej rreth 9,500 kilometrash katrorë, do të shtrihet fillimisht rreth ishujve jugorë të Ciklades, më në jug të Turqisë. Ky njoftim ka ngjallur kundërshtime nga Ankaraja.
Greqia ka theksuar se çështja e vetme që është e gatshme të diskutojë me Turqinë është përcaktimi i zonave detare, përfshirë shelfin kontinental dhe zonën ekskluzive ekonomike.
