Loading ...
Google do të urdhërohet të paguajë 403 milionë euro për mënyrën se si ka përpunuar të dhënat e vendndodhjes së përdoruesve.
Gjoba është vendosur nga Komisioni Irlandez për Mbrojtjen e të Dhënave (DPC), pas ankesave të disa grupeve europiane të konsumatorëve, të cilat pretenduan se Google po gjurmonte lëvizjet e përdoruesve përmes telefonave të tyre celularë.
Ankesat lidhen me përdorimin e të dhënave të vendndodhjes për reklama të personalizuara, një praktikë e zakonshme në industrinë e teknologjisë. Megjithatë, shtatë grupe europiane të konsumatorëve argumentuan se përdorimi i pajustifikuar i të dhënave të vendndodhjes mund të çonte në shkelje të privatësisë.
Hetimi i DPC-së u nxit nga një studim i Agjencisë Norvegjeze për Mbrojtjen e Konsumatorit, i publikuar në vitin 2018, i cili sugjeronte se të dhënat e vendndodhjes mund të zbulonin informacione të ndjeshme për një individ.
Sipas studimit, gjurmimi i vendeve të vizituara mund të tregonte, për shembull, bindjet fetare përmes frekuentimit të vendeve të kultit, bindjet politike përmes pjesëmarrjes në protesta, gjendjen shëndetësore përmes vizitave në spitale, si dhe orientimin seksual përmes vizitave në ambiente të caktuara.
DPC-ja nisi hetimin gjashtë vjet më parë për të përcaktuar nëse “Google” kishte një bazë të vlefshme ligjore për përpunimin e të dhënave të vendndodhjes.
Sipas hetimit, përdoruesit e “Google” mund të mos kenë qenë plotësisht në dijeni se të dhënat e tyre të vendndodhjes po përdoreshin për t’u shfaqur reklama të targetuara ose për të krijuar informacione mbi shëndetin dhe interesat e tyre.
“Të dhënat e vendndodhjes janë një lloj i të dhënave personale të përpunuara përmes gjurmimit të vendndodhjes dhe përfshijnë të dhëna të mbledhura ose të përpunuara nga Google që, vetëm ose në kombinim me informacione të tjera, zbulojnë vendndodhjen e një individi”, shpjegoi një zyrtar i DPC-së.
Google, në reagimin e tij ndaj vendimit, tha se çështja lidhet me “politika më të vjetra që tani janë rishikuar”.
Kompania shtoi se “që nga viti 2019, ne kemi evoluar ndjeshëm praktikat tona dhe kemi lançuar mjete të fuqishme që thjeshtojnë menaxhimin e të dhënave të vendndodhjes”.
Gjoba prej 403 milionë eurosh është ndër gjobat më të mëdha të vendosura nga rregullatori irlandez, i cili ka juridiksion në të gjithë Bashkimin Europian për kompanitë e mëdha të teknologjisë amerikane që kanë selinë e tyre europiane në Irlandë.
/abcnews.al/
