Për të katërtin vit radhazi, finalja e basketbollit amerikan do të jetë mes Golden State dhe Cleveland. Kampionia në fuqi ia doli pas një suksesi të vështirë ndaj Houston.
Përvoja është thuajse vendimtare edhe në sport, dhe duhet kohë e gjatë për ta mposhtur.
Pas Boston Celtic-it, edhe Houston Rockets kuptoi se ende nuk kishte ardhur momenti për një “kryengritje” të suksesshme ndaj dy dinastive sunduese në NBA, Celveland Cavaliers e Golden State Worriors.
Dy skuadrat do të ndeshen për herë të katërt radhazi në finalet e basketbollit amerikan, seria më e gjatë në të gjithë historinë.
Golden State e siguroi “biletën” e finales mbrëmjen e fundit në fushën e Houston, ndihmuar nga katërshja e vet e madhe, por edhe nga mungesa po kaq e madhe e Kris Polit për vendasit.
Kampionët në fuqi të NBA-së ia dolën 101-92, por vetëm pasi reaguan pas pushimit.
Pjesa e parë e tyre ishte tepër e keqe, dhe u deshën fjalët e forta të trajnerit Stiv Kerr, që ekipi të reagonte.
Siç thuhet në zhargonin e NBA-së, yjet miq “morën zjarr”.
Kevin Durant shënoi 34 pikë, Stephen Curry u përgjigj me 27 pikë, 9 topa në tabela, 10 asistë, 4 vjedhje topi e 1 bllokim gjuajtjeje.
Përveç tyre ishte edhe kapiteni Thompson që shtoi 19 pikë, ndërsa Draymond Green ishte ai i përhershmi, me 10 pikë, 13 topa në tabela e 5 asistë.
Houstoni dështoi në armën më të fortë, gjuajtjet për tri pikë, duke humbur 27 të tilla radhazi, e duke shënuar vetëm 7 në 44!
James Harden vërtet shënoi 32 pikë (pati dhe 6 topa në tabela, 6 asistë, 4 vjedhje topi), por gaboi shumë në gjuajtje.
Gordon, Kapela e Taker bënë maksimumin, por Houstoni nuk pati “thellësinë” e duhur për të përballuar kundërshtarin.
Finalet e NBA-së, mes Worriors dhe Cleveland-it të Lebron Jamest, do të nisin duke u gdhirë e shtuna në Shqipëri, dhe ndeshja e parë do të jetë në Oklend, në fushën e Golden State./abcnews.al
