Loading ...
TIRANË- Avokati i ish-kryetarit të Parlamentit të Kosovës Kadri Veseli, Rodney Dixon ka akuzuar Zyrën e Prokurorit të Specializuar, se për të, ligji dhe rregullat janë të papërfillshme.
“Ne e kuptojmë se ligji për [ZPS] është i pavolitshëm”, u shpreh ai.
Ai u shpreh se provat e sjella nga Prokuroria Speciale nuk janë testuar dhe kështu, nuk mund të përdoren si bazë e vetme për të dalë me vendim fajësie.
“Konfirmimi është gjithmonë në varësi të rregullës 144, që ndalon pa përjashtim përdorimin e provave të patestuara si bazën e vetme për të dalë me vendim fajësie. Të gjitha argumentet ndaj zotit Veselit janë të pabazuara”, tha Dixon.
Më tej, Dixon deklaroi se argumentet e Prokurorisë së Specializuar ndaj klientit të tij, janë thjesht një “grumbull mbeturinash”, që nuk vërtetojnë përfshirjen e Veselit në veprimtari kriminale.
“ZPS-ja nuk e pranon që është gabim. Ne i kemi trajtuar gjerë e gjatë makinacionet e grumbullit të thashethemeve që ka ZPS-ja lidhur me pretendimet e drejtpërdrejta, dhe themelësinë e argumenteve të tyre, që sipas nesh nuk ekziston fare.
Janë 15 faqe vetëm për një pretendim, ku kemi thënë se si provat e bazuara vetëm në thashetheme janë thjesht një grumbull mbeturinash që nuk vërtetojnë aspak që zoti Veseli të ketë qenë i përfshirë në ndonjë veprimtari, e lëre më të ishte i pranishëm kur diçka ka ndodhur”, tha Dixon.
Më tej, Dixon kërkoi të kontrollohet narrativa e rreme dhe të gjendet e vërteta në gjithë këtë rrëmujë, pasi ZPS-ja nuk ka asnjë provë.
“Mbrojtja ka të drejtë që të tregojë që pretendimet janë të bazuara në thashetheme dhe janë të pabaza. Ajo që mbetet është thjesht thërrime thashethemesh, tregon përbuzje për vet themelimin e kësaj gjykate. Të kontrollohet narrativa e rreme, të gjendet e vërteta në gjithë këtë rrëmujë që nuk ka asnjë provë në argumentet e ZPS-së”, u shpreh ai. /abcnews.al
