Një gjykatë indiane më në fund ka liruar aktoren Shilpa Shetty nga akuzat për paturpësi, pasi 15 vjet më parë ylli i Bollywood-it u puth në skenë nga aktori Richard Gere. Pamjet e vitit 2007 treguan yllin e Hollywood-it duke puthur faqen e zonjës Shetty në një ngjarje ndërgjegjësuese për Sidën në Delhi. Akuzat vetëm tani janë shpallur “të pabaza”, me gjykatën që tha se ajo ishte viktimë e një avancimi të padëshiruar.
Në atë kohë, puthja shkaktoi protesta nga grupet radikale hindu, të cilët e konsideruan atë si një fyerje ndaj vlerave indiane. Puthja në publik konsiderohet nga disa në Indi si tabu. Zoti Gere përqafoi dhe puthi zonjën Shetty në një skenë publike në një ngjarje bamirësie në Delhi gati 15 vjet më parë, një shfaqje për të cilën më vonë kërkoi falje raporton “BBC”.
Aktori tha se ishte përpjekur të tregonte se puthja ishte një akt i sigurt që nuk mund të çonte në transmetimin e HIV. Një urdhër arresti i lëshuar për aktorin për incidentin u hodh poshtë nga Gjykata e Lartë e Indisë menjëherë më pas. Ajo hodhi poshtë pretendimet kundër personazhit të famshëm të paraqitura si “publicitet i lirë”.
Por vetëm javën e kaluar akuzat kundër aktores indiane për të njëjtin incident u hodhën poshtë në Mumbai. Ekipi ligjor i yllit të Bollywood-it argumentoi se ishte e padrejtë që zonja Shetty të konsiderohej “autore” për të mos protestuar mjaftueshëm kundër puthjes në atë kohë. Shilpa Shetty gjithashtu u vu në qendër të vëmendjes jashtë Indisë në vitin 2007 pasi u shfaq në shfaqjen televizive realiste në Mbretërinë e Bashkuar “Celebrity Big Brother”, ku ajo ishte viktimë e ngacmimeve dhe fyerjeve raciste.
Ajo në fund u shpall fituese e programit. / abcnews.al
