Temperaturat e ulta që kanë përfshirë vendin ditët e fundit kanë sjellë problemet e para në qytetin e Gjirokastrës. Rrjedhja e ujit si pasojë e çarjes së tubacionit të ujit ka sjellë krijimin e ngricave në rrugë.
E gjithë kjo situatë ka bërë që qytetarët dhe drejtuesit e automjeteve ta kenë shumë të vështirë kalimin në të. Ndërkohë që nga ana e Bashkisë së Gjirokastrës, nuk është marrë ende asnjë masë.
Moslargimi i ngricave të krijuara në lagjen “Cfakë” në Gjirokastër po rrezikon qytetarët nga ndonjë lëndim i mundshëm.
Rruga është e mbuluar e gjitha nga akulli çka vështirëson jo vetëm lëvizjen e këmbësorëve por edhe të mjeteve.
Banorët e kësaj lagjeje ankohen se bashkia nuk ka marrë asnjë masë për hedhjen e kripës.
Krijimi i ngricave nga derdhja e ujit nga depozitat është një problem që përsëritet gjithmonë kur ulen temperaturat. Në pjesën më të madhe të rasteve janë vetë banorët ata që marrin masa për pastrimin e rrugëve pranë banesave të tyre./abcnews.al
