Data e zgjedhjeve të parakohshme po shoqërohet me debate të forta në Gjermani. Opozita kërkon që zgjedhjet të zhvillohen sa më shpejt. Pas disa ngurrimesh Scholz tha: “Jam i gatshëm për votëbesimin madje edhe këtë vit.”
Pyetja kryesore që preokupon Gjermaninë këto ditë është se kur do të zhvillohen zgjedhjet e parakohshme? Pas shpërbërjes së koalicionit qeveritar, kancelari Olaf Scholz (SPD) caktoi fillimisht datën 15 janar si datën ku do të kërkojë votëbesimin, por pas presionit nga partitë CDU/CSU dhe FDP, por edhe nga Të Gjelbërit, që janë ende partnerë të koalicionit, kancelari Scholz u shpreh i gatshëm për një datë më të hershme.
Gjatë një interviste me gazetaren Caren Miosga në televizionin publik gjerman ARD kancelari Scholz tha: “Jam i gatshëm për votëbesimin madje edhe këtë vit”.
Kryetari i CDU-së Merz dëshiron që kancelari Scholz ta kërkojë votëbesimin këtë të mërkurë në mënyrë që zgjedhjet e parakohëshme të zhvillohen më 19 janar.
Kancelari Scholz, tha se datën e zgjedhjeve duhet ta diskutojmë sa më qetë të jetë e mundur. Sipas tij, do të ishte mirë që fillimisht “të arrihet një marrëveshje mes grupeve parlamentare demokratike në Bundestag se cilat ligje mund të miratohen këtë vit”.
Po ashtu kancelari tha se është i gatshëm të bisedojëpër një datë më të hershme, por me kusht që CDU dhe CSU të mbështesin propozimet e koalicionit qeverisës për disa ligje të reja. Por lideri i opozitës Friedrich Merz (CDU) e refuzoi këtë ofertë dhe tha: së pari duhet mocioni i mosbesimit, pastaj bisedimet për ligjet.
Në debatin politik për datën e zgjedhjeve janë përfshirë tani edhe reagimet e drejtueses së Komisionit Qendror të Zgjedhjeve. Drejtuesja e kësaj zyre, Ruth Brand, i ka dërguar kancelarit Olaf Scholz një letër në të cilën i bën thirrje të mos nxitojë me datën për zgjedhje të reja. Për arsye organizative, kjo është e rrezikshme, shkruan drejtoresha e zgjedhjeve Ruth Brand në letrën drejtuar Scholzit.
Letra mban tiutllin: “Sfidat dhe rreziqet e zgjedhjeve të parakohshme në janar ose shkurt 2025”. Sipas Ruth, “në përgjithësi, në këtë rast unë shoh një rrezik të lartë që të cenohet gurthemeli i demokracisë dhe besimit në integritetin e zgjedhjeve.”
Për një zgjedhje të mirëorganizuara duhet të shfrytëzohet plotësisht periudha prej 60 ditësh nga shpërbërja e Bundestagut. “Nëse datat dhe afatet do të bien gjatë sezonit të Krishtlindjeve ose në periudhën e ndryshimit të viteve, periudha shumë e shkurtër prej 60 ditësh do të shkurtohej ndjeshëm”, shkruan Brand.
Ajo do të takohet me kolegët e saj të hënën (11.11.) për të diskutuar mbi problemet e organizimit të zgjedhjeve të parakohshme.
Sipas Brand, kjo mund të çojë në “rreziqe të paparashikueshme në të gjitha nivelet”. Një sërë detyrash duhet të kryhen në një kohë të shkurtër: Sigurimi i infrastrukturës së IT në nivel federal, shtetëror dhe lokal, duke përfshirë masat e sigurisë kundër kërcënimeve hibride; Përgatitja e materialeve të votimit si fletëvotimet, e cila është e vështirë për shkak të pengesave aktuale të furnizimit; Emërimi dhe trajnimi i punonjësve zgjedhorë; Organizimi dhe pajisja e dhomave të përshtatshme të votimit.
Brand gjithashtu ka frikë se propozimet zgjedhore nën presion kohor mund të kenë gabime, që sjellin mosmiratime e probleme të reja. P.sh. partitë pa përvojë që duhet të mbledhin nënshkrime mbështetëse do të ishin nën presion edhe më të madh kohor. Mbingarkimi i zyrave zgjedhore mund të rezultojë që dokumentet e votimit postar të mos dërgohen në kohë, veçanërisht jashtë vendit.
Brand i bën thirrje Scholz-it të marrë parasysh rreziqet e përmendura kur shqyrton zgjedhjet e parakohshme dhe të mbështesë autoritetet në përgatitjen dhe zbatimin e duhur të zgjedhjeve./DW/
