Një turist spanjoll është gjetur i vdekur në një hotel në Divjakë. Sipas informacioneve të para, dyshohet se 47 vjeçari Franciso Cervilla ka dëmtuar veten me thikë dhe për pasojë ka humbur jetën. Sipas dëshmisë së shokut të dhomës, ai është dëmtuar me mjet prerës gjatë kohës që ka qenë duke bërë dush.
Njoftimi i policisë:
Në fshatin Karavasta, Divjakë, në një hotel, shtetasi spanjoll F. C., 47 vjeç, dyshohet se ka dëmtuar veten me mjet prerës (thikë) dhe për pasojë ka humbur jetën.
Sipas deklarimeve të para të shokut të tij të dhomës, shtetasit spanjoll O. V., 41 vjeç, rezulton se 47-vjeçari është dëmtuar me mjet prerës gjatë kohës që ka qenë duke bërë dush.
Nga ana e grupit hetimor, nën drejtimin e Prokurorisë, po kryhen veprime të thelluara hetimore për sqarimin e rrethanave të ngjarjes, për të përcaktuar shkakun e kryerjes së vetëvrasjes.
Ndërkohë, është shoqëruar në ambientet e Policisë, shoku i dhomës, shtetasi O. V., për sqarimin e të gjitha rrethanave dhe mekanizmit të ngjarjes.
Në përfundim të veprimeve të para hetimore në vendngjarje do ketë njoftim të detajuar për këtë rast./abcnews.al
