Të gjithë po mundohen të kontribuojnë në këtë situatë kaotike dhe plot dhimbje. Vendi po kalon një moment shumë të vështirë, teksa tërmetet vazhdojnë dhe bien sërish për të mos i lënë të qetë shpirtrat e shqiptarëve. Armand Duka, presidenti i FSHF-së, ka pritur në Durrës dy homologët nga Kosova dhe Maqedonia e Veriut.
Kreu i futbollit shqiptar ka reaguar me anë të një postimi në rrjetet sociale, aty ku shfaqet me Agim Ademin, kreun e FFK-së, dhe Muamed Sejdinit, kreut të Federatës së Maqedonisë së Veriut. Së shpejti do të nisë ndërtimi i tre shtëpive të rrënuara, teksa fushata e ndhimës do të vazhdojë edhe në ditët në vijim.
“Sot në Durrës prita dhe takova me kënaqësi miqtë dhe homologët e mi, Presidentë të Federatës së Futbollit të Kosovës dhe Federatës së Futbollit të Maqedonisë së Veriut, Agim Ademi dhe Muamed Sejdini, të cilët shprehën dëshirën për t’ju bashkuar FSHF-së në kontributin për familjet e prekura nga tërmeti.
Duke u nisur nga dëshira dhe nga gatishmëria nga i gjithë komuniteti i futbollit, ne marrim përsipër rindërtimin e tre shtëpive të rrënuara. Fushata e ndihmës nga ana e FSHF-së do vijojë në ditët në vazhdim. Ne jemi një skuadër!“, përfundon Armand Duka. /abcnews.al
