Loading ...
Më shumë se 7,000 gjuhë fliten sot në mbarë botën dhe të paktën 3,000 prej tyre, ose 40 përqind, janë në rrezik zhdukjeje.
Anglishtja është gjuha më e folur gjerësisht, me afërsisht 1.5 miliardë folës në 186 vende.
Dy nga çdo 10 folës të anglishtes e kanë gjuhë amtare, ndërsa 80 përqind e mbetur e flasin anglishten si gjuhë të dytë, të tretë ose më të lartë, sipas Ethnologue, një bazë të dhënash që katalogon gjuhët e botës.
Gjuha kineze mandarine është gjuha e dytë më e folur me pothuajse 1.2 miliardë folës, shkruan Al Jazeera.
Megjithatë, duke llogaritur edhe folësit amtarë, është gjuha më e madhe në botë, për shkak të popullsisë së madhe të Kinës.
Indishtja renditet e treta me 609 milionë folës, e ndjekur nga spanjishtja (559 milionë) dhe arabishtja standarde (335 milionë).
Sipas The World’s Writing Systems, një libër referimi rreth shkrimeve globale, njihen 293 shkrime – grupe karakteresh grafike të përdorura për të shkruar një gjuhë.
Më shumë se 156 shkrime janë ende në përdorim sot, ndërsa më shumë se 137 shkrime historike, duke përfshirë hieroglifet egjiptiane dhe piktogramet azteke, nuk janë më në përdorim.
Alfabeti latin, i cili përdoret për të shkruar anglisht, frëngjisht, spanjisht, gjermanisht dhe më shumë, përdoret në të paktën 305 nga 7,139 gjuhët e njohura njerëzore në botë.
