Në intervistën e saj të parë televizive me transmetuesin konservator amerikan ”Fox News”, kandidatja demokrate presidenciale e SHBA, Kamala Harris u angazhua në një debat të nxehtë me prezantuesin, në një intervistë që ishte më konfrontuese se ato të mëparshmet.
Biseda afërsisht 30 minuta u duk si një duel, me prezantuesin e Fox-it, Bret Baier duke ndërprerë vazhdimisht Harris-in për temën e parë: migracionin.
Harris u mbrojt fillimisht, por rifitoi pozitën e saj ndërsa diskutimi përparonte. Kandidati republikan rival i Harrisit, Donald Trump, një ish-president, e kritikon rregullisht Harrisin për çështjet kufitare.
“A mund të përfundoj përgjigjen?”, e pyeste Harris vazhdimisht, ndërsa Baier e ndërpriste gjatë intervistës.
Ajo tha se ishte e drejtë që publiku amerikan dëshironte një diskutim mbi migracionin përpara zgjedhjeve. Megjithatë, ajo që njerëzit nuk donin ishte që politikanët ta përdornin çështjen e kufirit për qëllime politike.
Baier e pyeti Harrisin nëse i detyrohej një falje të afërmve të grave të vrara nga emigrantët.
Ndërsa ajo i quajti ato raste “tragjike”, Harris vuri në dukje se sistemi i migracionit në SHBA është thyer për një kohë të gjatë dhe Kongresi është përgjegjës për rregullimin e tij.
Dhoma e Përfaqësuesve dhe Senati kishin hartuar një projektligj dypartiak për imigracionin në fillim të këtij viti, por republikanët vendosën veton ndaj tij, pasi Trump thuhet se nuk donte t’i jepte Biden një fitore për këtë çështje.
Harris akuzoi republikanët dhe Trump për bllokimin e një zgjidhjeje.
Baier më pas e zhvendosi bisedën në temën e operacioneve të ndryshimit të gjinisë dhe të drejtave transgjinore, një temë shpesh e politizuar nga konservatorët.
Ai e pyeti Harrisin nëse paratë e taksapaguesve duhet të përdoren për këtë.
Harris tha se Trump “shpenzoi 20 milionë dollarë për ato reklama duke u përpjekur të krijonte një ndjenjë frike tek votuesit, sepse ai në fakt nuk ka asnjë plan në këto zgjedhje që ka të bëjë me fokusimin në nevojat e popullit amerikan”.
Të dy u grindën për aftësitë njohëse të Biden, ish-kandidatit demokrat, dhe Trump. Biden u tërhoq pas një debati katastrofik me Trump, në të cilin presidenti shpesh humbi mendimet e tij dhe shpesh fliste gabimisht.
Por, Trump pati një ngjarje të zhurmshme të fushatës së fundit në të cilën ai qëndroi para një turme dhe kërcente për rreth 20 minuta.
Harris vuri në dukje se ata që e njihnin më mirë Trumpin – shumë ish-anëtarë të stafit – nuk po votojnë për të dhe e konsiderojnë Trump të papërshtatshëm për presidencën.
Harris u distancua qëllimisht nga Biden duke thënë “më lejoni të jem shumë e qartë, presidenca ime nuk do të jetë një vazhdim i presidencës së Joe Biden”.
Ajo vuri në dukje se është e një gjenerate dhe prejardhjeje tjetër dhe do të sillte përvojën dhe idetë e saj të reja në Shtëpinë e Bardhë.
Ekipi i fushatës së Trump e quajti intervistën një fiasko dhe e etiketoi Harrisin si “të zemëruar”. Trump sulmoi edhe Baierin, moderatorin, përpara intervistës, duke thënë se ai ishte i butë dhe duke kritikuar atë që dikur dukej të ishte kanali i tij i preferuar, ”Fox News”.
