Asgjë nuk është e lehtë në një vend ku jetojnë dy etni.
Një rast i tillë është shteti me emrin Maqedonia e Veriut, dikur thjesht Maqedoni, dhe ku maqedonasit e shqiptarët ndodh edhe që përplasen.
Liga e Parë e futbollit të këtij shteti u trondit nga acarimi mes lojtarëve të të dyja skuadrave në sfidën Gostivari-Vardar, me vendasit kryesisht shqiptarë, që ishin përballë ekipit më të lavdishëm maqedonas, por që prej vitesh është në krizë.
Skuadra nga Gostivari kaloi e para në epërsi, ndërsa miqtë barazuan në sekondat e fundit të sfidës e ndoshta kjo ishte një nga arsyet e acarimit.
Një përplasje masive ndodhi pranë vijës së mesit të fushës, pranë stolave të dy ekipeve, dhe u desh ndërhyrja e policisë që gjithçka të vihej nën kontroll.
Dëmtime fizike të lojtarëve nuk pati.
Gostivari është në vendin e pestë, në një kampionat ku po dominojnë Shkëndija e Tetovës, Rabotnicki dhe Struga, ndërsa Vardari vazhdon të jetë larg lavdisë së dikurshme, pasi ndodhet në vendin e fundit. /i.m /abcnews.al
