Shqipëria ka humbur statusin e eliminimit të sëmundjes së fruthit.
Organizata Botërore e Shëndetësisë e ka bërë të ditur me përfundimin e verifikimeve të kryera në këto vende.
Shqipëria rrezikohet nga përhapja e gjerë e fruthit. Vendi ynë bashkë me tre shtete të tjera ku sëmundja më herët ishte çrrënjosur si Çekia, Greqia dhe Mbretëria e Bashkuar sipas Organizatës Botërore të Shëndetësisë tashmë kanë humbur statusin e eliminimit të fruthit.
Komisioni Rajonal i Verifikimit për zhdukjen e Fruthit dhe Rubeolës ka arritur në këtë përfundim pas verifikimit të kryer nisur në vitin 2012.
Kryetari i komisionit vëren me shqetësim se;
“Rivendosja e transmetimit të fruthit është shqetësuese. Nëse mbulimi i imunizimit i lartë nuk arrihet dhe nuk mbahet në çdo komunitet, fëmijët dhe të rriturit do të vuajnë dhe do te vdesin në mënyrë tragjike ”
Qarkullimin e vazhdueshëm të fruthit në rajon Organizata Botërore e Shëndetësisë e konsideron urgjencë të klasës së dytë që lejon OBSH të mobilizojë burime teknike, financiare dhe njerëzore për të mbështetur vendet e prekura./ABC News Albania 24/7
