Vasil Kallupi është biznesmeni shqiptar që ka qenë në fokus të mediave ditët e fundit, pas publikimit të skandalit me përmasa globale, “Pandora Papers”. Rrjeti investigativ BIRN, publikoi një artikull lidhur me kompaninë e Kallupit, e cila kishte përfituar miliona euro, nga nënkontraktori i OST, EnergoInvest. Kallupi thotë se informacionet lidhur me kompaninë e tij kanë qenë publike, në websitin e kompanisë dhe se ka patur disa bashkëpunime me kompaninë e njohur, EnergoInvest.
“Dokumentet e publikuara nuk zbulojnë asnjë sekret ashtu siç ka pretenduar t’i paraqes gazetari, por konfirmojnë informacione zyrtare të publikuara në Website-in zyrtar te kompanisë time. Manipulimi i radhës bëhet me të dhënat e llogarisë bankare, me pretendimin se unë kam pranuar 3.6 milion euro nga Energoinvest brenda një muaji pasi . E vërteta është se, unë kam pasur disa bashkëpunime me Energoinvest, nga të cilat kam pranuar pagesa për punët dhe aktivitetet e realizuara sipas kontratave dhe raporteve për punën e kryer”, thotë ndër të tjera Kallupi.
Reagimi i plotë i Vasil Kallupit:
Lajmet e fundit të paraqitura në mediat e vendit rreth emrit tim Vasil Kallupi dhe kompanisë time më detyrojnë të jap disa sqarime.
Nuk është e ndershme, etike dhe aspak profesionale, që një gazetar mendon se lartëson veten profesionalisht, duke publikuar artikuj sensacional në vazhdën e skandalit të quajtur “Pandora Papers”. Nuk mund të hidhet baltë mbi punën dhe biznesin tim privat, duke pretenduar se mediokriteti i gazetarisë ka zbuluar “sekrete” dhe “bashkëpunime sekrete” . Nuk mundet që ndërmjet shpifjes të ndërlidhen insinuata dhe të pavërteta që cenojnë drejtpërdrejt figurën time.
Me gjithë respektin për profesionin e gazetarisë, pas të cilit qëndrojnë shumë profesionistë që flasin vetëm me zërin e së vërtetës , është detyrim moral i gjithë secilit për të demaskuar ata që shpifin e abuzojnë në emër të së vërtetës, duke manipuluar opinionin publik me informata të pavërteta.
Kompania ime, AL Energy është kompani e regjistruar zyrtarisht në Emiratet e Bashkuara në Dubai me Website zyrtar, në të cilën janë publikuar të gjitha bashkëpunimet e mia me të gjitha kompanitë ndërkombëtare, përfshirë këtu edhe kompaninë Energoinvest, përfaqësues i së cilës jam që nga viti 2012.
Nga kompania SMF e cila menaxhon kontabilitetin e kompanise time, janë vjedhur dokumentat personale . Këto dokumente të marra në rrugë jo ligjore, janë publikuar për të krijuar sensacion në opinionin publik.
Dokumentet e publikuara nuk zbulojnë asnjë sekret ashtu siç ka pretenduar t’i paraqes gazetari, por konfirmojnë informacione zyrtare të publikuara në Website-in zyrtar te kompanisë time.
Manipulimi i radhës bëhet me të dhënat e llogarisë bankare, me pretendimin se unë kam pranuar 3.6 milion euro nga Energoinvest brenda një muaji pasi .
E vërteta është se, unë kam pasur disa bashkëpunime me Energoinvest, nga të cilat kam pranuar pagesa për punët dhe aktivitetet e realizuara sipas kontratave dhe raporteve për punën e kryer gjatë gjashtë viteve 2013/2019.
Manipulimi me etjen e popujve të Ballkanit për drejtësi dhe transparencë është pandershmëri dhe krim në vetvete.
Tentativa e ulët për të më njollosur mua dhe familjen time, vetëm pse posedoj një kompani që ka publikuar zyrtarisht të dhënat në Website,është veprim jo profesional që nuk i bën nder as shqiptarëve, as rrjeteve të gazetarisë investigative, apo çdokujt askujt tjetër që ka për qëllim drejtësinë dhe të vërtetën.
Vasil Kallupi ka shumë miqësi dhe është mik i shumë mjekëve, sportistëve, gazetarëve, këngëtarëve, politikanëve në mbarë botën , të gjithë emra të mëdhenj e të nderuar.
Lakimi i shumë emrave se unë isha mik me këtë apo atë, kishin vetëm një qëllim, shtrëmbërimin e të vërtetës dhe keq informim të opinionit publik. Gjithçka e paraqitur në emrin tim, vërtetojnë edhe një herë, jo profesionalizem dhe mungesë etike të disa ashtuquajturve gazetar. Pa dyshim papërgjegjshmëria dhe paaftësia e një gazetari, nuk mund të rrënoj mundin, djersë, dijen dhe sakrificën e një punëtori dhe biznesmeni të ndershëm.
Bashkëpunimet me kompaninë Energoinvest apo shumë kompani të tjera kanë qenë publike dhe transparente në çdo moment për të gjithë gazetarët dhe qytetarët, prandaj paraqitja e bashkëpunimeve të mija me kaq pompozitet si zbulim “sekretesh” është akt i turpshëm dhe i papërgjegjshëm për një gazetar.
Duke marr shkas nga ngjarja, e cila cenon drejtpërdrejt personalitetin dhe biznesin tim, unë kam autorizuar avokatet e mi, qe do te ndërmarrin gjithë hapat ligjore duke kërkuar pushimin e këtij cenimi dhe rivendosjen e nderit dhe personalitet tim.
Me respekt
Vasil Kallupi
