Flamurtari pati sërish akuza për arbitrimin në Superligë. Në ndeshjen ndaj Teutës, vlonjatët pretenduan se nuk iu dha një gol i drejtë, që do t’u kishte siguruar fitoren.
Kur ndodh një herë quhet rastësi, po kështu edhe kur përsëdytet.
Gjithsesi, nëse rastet janë më të shumta, atëherë fillojnë dyshimet, ndërsa tek Flamurtari prej kohësh kanë nisur protestat.
Iu dha sërish shkak në përballjen e fundit të Superligës ndaj Teutës, kur një tjetër episod i dyshimtë ishte kundër.
E kaloi apo jo topi vijën fatale, pra duhej quajtur apo jo gol nga gjyqtari Enea Jorgji?
Në mungesë të teknologjisë, treshja e gjyqtarëve mund të jetë e mbrojtur, por si i bëhet kur një gol i shënuar ndaj Kukësit anulohet si i parregullt, po ashtu një gol ndaj Skënderbeut.
Po kur nga disa momente për penallti nuk jepet asnjë?
Shpëtim Duro: “Në Vlorë çdo ndeshje u bë e zakonshme. Të tjerët po marrin nga 3 pikë, 6 pikë, 9 pikë, i fusin valle me gola e penallti të dyshimta, kurse ne në çdo ndeshje me një situatë të tillë, u bë mëse e zakonshme dhe nuk më bën përshtypje”.
Një nga njerëzit e njohur të futbollit në Vlorë, Saimir Haxhiu, u shpreh kështu pak kohë më parë për ABC News-in.
Saimir Haxhiu: “Flamurtari është penalizuar seriozisht ne 3-4 ndeshje. Për hir të së vërtetës, mendonim që do të ishte më lart me ato ndeshje që ka zhvilluar dhe me ato rezultate që i ka merituar për të patur”.
Shpëtim Duro: “Barazim i pranueshëm por do të ishte shumë pozitive që ne duhet të kishim fituar, por patjetër edhe faktorët që kam theksuar, një stadium i boshatisur në një moment të mirë të skuadrës dhe mungesa e një nga lojtarëve kryesorë na penalizoi shumë”.
Trajneri i Teutës, Magani, nuk dëshiron të bëjë polemika.
Gugash Magani: “Përveç episodit të rastit të diskutueshëm që normalisht është pjesë e gjyqtarëve dhe nuk mund ta komentoj, sepse pashë qe kishte kontestime, edhe une kam kontestuar kur janë anulluar golat. Nga mënyra se si erdhi loja nuk jam i kënaqur me pikë sepse ne ishim më afër portës se Flamurtari”./abcnews.al
