Vendet në Europën Lindore dhe Qendrore mund të jenë të rrezikuara gjatë një pushtimi pasi NATO-s i mungojnë sistemet e mjaftueshme të mbrojtjes ajrore për t’i mbrojtur ato, sipas Financial Times.
Siç theksohet nga publikimi përkatës, duke cituar njerëz me njohuri për planet e mbrojtjes së NATO-s, anëtarët e Aleancës kanë më pak se 5% të aftësive të mbrojtjes ajrore të nevojshme për të mbrojtur krahun e saj lindor nga sulmet në shkallë të gjerë.
Një diplomat i lartë i NATO-s tha se aftësia për t’u mbrojtur kundër raketave dhe sulmeve ajrore ishte “një pjesë e rëndësishme e planit për të mbrojtur Europën Lindore nga pushtimi”, duke shtuar: “Dhe tani, ne nuk e kemi atë”.
Ministrat e Jashtëm të vendeve anëtare të NATO-s po takohen të enjten në Pragë për dy ditë bisedimesh që synojnë përgatitjen e samitit të korrikut të liderëve të NATO-s në Uashington, ku forcimi i mbrojtjes europiane do të jetë tema kryesore.
Disa udhëheqës europianë dhe zyrtarë ushtarakë kanë thënë se Rusia mund të ketë aftësinë për të sulmuar një shtet anëtar të NATO-s deri në fund të dekadës.
Në shkurt, shërbimet e inteligjencës estoneze theksuan se presin një “rritje të konsiderueshme të forcave ruse pranë kufirit të Estonisë në vitet e ardhshme”, duke shtuar se “Kremlini me siguri pret një konflikt të mundshëm me NATO-n brenda dekadës së ardhshme”.
Kërcënimet e Putinit
Presidenti rus Vladimir Putin të martën la të hapur mundësinë e hakmarrjes ruse kundër vendeve europiane që i bëjnë thirrje Ukrainës të nisë sulme në tokën ruse.
“Këta zyrtarë të vendeve të zakonshme anëtare të NATO-s, veçanërisht ata në Europë dhe veçanërisht në vendet e vogla europiane, duhet të dinë se çfarë është në rrezik.
Vendet e tyre janë të vogla dhe me popullsi të dendur, një faktor që duhet ta marrin parasysh përpara se të flasin për sulme thellë brenda territorit rus.
Ky përshkallëzim i pafund mund të çojë në pasoja të rënda”, u tha Putin gazetarëve.
/abcnews.al
