Loading ...Në zemër të Parkut Kombëtar të Shebenikut, aty ku malet e kuqe të Qarrishtës prekin qiellin dhe era bart aromën e dushkut e të pishave, një festë e veçantë mbushi ajrin me tinguj kënge, gjallëri dhe dashuri për natyrën. “Shebeniku Feston” nuk ishte thjesht një aktivitet, por një takim ku historia, kultura, natyra dhe komuniteti u bashkuan në një përjetim unik.
I organizuar në ish-sektorin e sharrave – një vend që dikur ushtonte nga zhurma e punës dhe sot prej gjelbërimit e paqes – ky aktivitet solli bashkë banorët e Qarrishtës, Dorëzit, Dragostunjës dhe fshatrave të tjera përreth.
Nën kujdesin e Administratës së Zonave të Mbrojtura dhe përkushtimin e komunitetit vendas, festa u shndërrua në një mesazh të fortë për promovimin e turizmit malor dhe trashëgimisë kulturore të zonës.
Parku Kombëtar Shebenik-Jabllanicë, një thesar natyror që prej 17 vitesh mban statusin e mbrojtjes, shtrihet në lindje të Shqipërisë, duke kufizuar me Maqedoninë e Veriut. Ky park, ndër më të pasurit në biodiversitet në gjithë Ballkanin, është shtëpia e rrëqebullit të Ballkanit – një specie e rrallë dhe e mbrojtur – si dhe e shumë florës e faunës të pazëvendësueshme.
Por këtë herë, përtej bukurisë natyrore, ishte njeriu ai që e pasuroi peizazhin. Fryma festive, këngët tradicionale dhe vallet popullore dhanë jetë një vendi që flet vetë për historinë e tij.
Ansamblet lokale u ngjitën në skenën e improvizuar natyrale, të rrethuar nga majat e gjelbra, duke interpretuar me pasion motive nga Librazhdi, Dorëzi dhe krahinat përreth.
Festa nuk ishte vetëm argëtim, por edhe një dëshmi e gjallë se si tradita, dashuria për natyrën dhe bashkëpunimi ndërmjet institucioneve dhe komunitetit mund të krijojnë përvoja që mbeten në kujtesë.
Fëmijë që kërcejnë për dore, të moshuar që këndojnë këngët e brezit të tyre dhe turistë të huaj që filmojnë çdo çast – të gjithë ishin pjesë e një skene të gjallë që promovoi jo vetëm një vend, por një mënyrë jetese dhe një identitet.
