Administrata Amerikane e Ushqimit dhe Barnave autorizoi të mërkurën trajtimin e parë antiviral oral për Covid-19. Bëhet fjalë për Paxlovid, një pilulë e prodhuar nga Pfizer. Kjo është pilula e parë antivirale Covid-19 e autorizuar që të sëmurët ta marrin në shtëpi, përpara se simptomat të rëndohen aq shumë sa të jetë i nevojshëm shtrimi në spital.
Paxlovid kombinon një medikament të ri antiviral të quajtur nirmatrelvir dhe një më të “vjetër” të quajtur ritonavir.
Javën e kaluar, Pfizer publikoi rezultatet e përditësuara që treguan se trajtimi ul rrezikun e shtrimit në spital ose vdekjes me 89% nëse u jepet të rriturve me rrezik të lartë brenda pak ditësh nga simptomat e tyre të para.
Nëse jepet brenda pesë ditëve të para të simptomave, efikasiteti i pilulës ishte i ngjashëm: 88%. /abcnews.al/
