Ministrja e Financave dhe Ekonomisë, Delina Brahimaj ka folur për mediat në lidhje me eurobondin e ri 10-vjeçar. Brahimaj tha se pavarësisht shumës shifra që duhet paguar është e barabartë me atë të viteve të kaluara për shkak se maturimi është 3 vjet më i lartë. Brahimaj u shpreh se ky ishte momenti më i mirë për të dalë në treg.
“Eurobondi pati kupon të përafërt me atë të dy viteve të fundit. Shifra që duhet paguar është e barabartë me atë të viteve të kaluar. Zgjatja dhe maturimi është 3 vjet më i lartë. Ka rëndësi të lartë për garantimin e prezencës së vendit tonë në tregjet ndërkombëtare dhe garantimin e besimit të investitorëve të huaj te qeveria shqiptare. Dalja në tregje me shumë të konsiderueshme meriton shpjegim më të thellë për rrethanat ku ndodhemi. Normat e interesit tani janë më të ulëtat në histori. Banka qendrore e SHBA pritet të kalojnë në politikat kontraktuese. Ky ishte momenti më i mirë për të dalë në treg. Niveli i lartë i borxhit nuk është i pëlqyeshëm për asnjë qeveri por duhet të marrim parasysh elemente të tjera”, tha Brahimaj.
Ajo deklaroi se rënia graduale e borxhit do të mbetet prioritet i qeverisë shqiptare përmes një strategjie që synon zgjatje të maturimit për të reduktuar koston.
“Një tregues shumë i rëndësishëm është raporti i rritjes ekonomike në raport me deficitin. Borxhi, defiçifti duhet të justifikohen me rritje të qëndrueshme ekonomike. Në vitin 2020 pati përkeqësim duke qenë se treguesit makroekonomikë patën goditje nga pandemia por edhe nga tërmeti. Rënia graduale e borxhit do të mbetet prioritet i qeverisë shqiptare. Parametrat makroekonomikë u përkeqësuan në gjithë botën. Në periudhën afatmesme ministria e Financave synon përmirësimin e mëtejshëm të strukturës së borxhit. Ne kemi hartuar një strategji të borxhit që siguron rritje të maturimit për të reduktuar koston. Edhe në daljet e tregjeve kombëtare synojmë të rrisim afatet e maturimit”, tha ministrja.
Ajo theksoi se kërkesat në treg kanë qenë 4-fish më të larta se ato që ishin parashikuar nga qeveria shqiptare. Pyetur nga gazetarët në lidhje me interesin e vendeve të rajonit, Brahimaj tha se ekonomia duhet të krahasohet me historinë e saj ndër vite dhe jo me vendet e tjera.
“Nga vlera që ne kishim parashikuar kërkesat ishin 4-fish më të larta duke konfirmuar besimin e investitorëve te qeveria shqiptare. Norma e interesit më e ulët dhe afati i maturimit më i lartë do mbeten në synimet tona në mënyrë që borxhi të ketë kosto më të ulët në vitet që do të vijnë. Mendoj që kemi bërë një punë shumë të mirë për garantuar arritjen me sukses të këtij objektivi.
Mendoj se nëse do kemi një bazë krahasimi, duhet që ajo të jetë me vendin tonë në vitet e kaluara. Këto krahasime duhen bërë me performancën e vetë ekonomisë. Ecuria e një ekonomie duhet të matet me historikun e saj. Kemi marrë një normë interesi 3.5 që është norma më e ulët ndonjëherë. Vendet fqinje kanë dalë me një afat maturimi më të ulët. Eurobondi do përdoret për mbështetje buxhetore për projektet e mëdha që qeveria ka për në vitin në vijim, për mbështetje të sektorëve kryesorë”, u shpreh Brahimaj. m.v/Abcnews.al
