Etrit Berisha pritet të bëjë një tjetër hap të madh në karrierë. Portieri i kombëtares shqiptare është objektivi i njërit prej klubeve më të mëdhenj të Serisë A.
Sërish në stadiumin e Diegos, këtë herë si i shtëpisë.
Këtë herë në krah të Elseid Hysajt dhe jo kundër tij siç ndodhi në Kupë, dhe janë pikërisht këto lajmet për Etrit Berishën.
Portieri i kombëtares shqiptare nuk ka kaluar pa rënë në sy me paraqitjet e tij në Serinë A, në Europë dhe në Kupën e Italisë, aq sa kryesuesja e kampionatit po mendon për të.
Trajneri Sarri ka garanci të shumta dhe jo thjesht një ndeshje shumë të mirë në çerekfinalen e Kupës.
Njerëzit e Napolit e kanë ndjekur Berishën edhe në ndeshjet e ndryshme të Serisë A, ku ai ka qenë shpesh herë vendimtar në rezultatet e Atalantës.
Pritet e shqiptarit nga Kosova kanë qenë të shumta dhe të vështira, me një nga kulmet në ndalimin e Paulo Dibalës së Juventusit, duke mos e lejuar të shënonte gol nga pika e bardhë e penalltisë.
Në moshën shumë të përshtatshme 28-vjeçare, djali nga Prishtina tashmë ka një karrierë të stabilizuar mirë dhe në rritje.
Periudha e vështirë tek Lacio, për shkak të konkurrencës së Marketit, tashmë është lënë pas, dhe Atalanta ishte konfirmimi i tij në futbollin italian dhe atë europian.
Me shumë gjasa, Napoli do ta bëjë lëvizjen gjatë verës, pikërisht atëherë kur i përfundon kontrata portierit aktualisht titullar, Pepe Reina./abcnews.al
