presheve

deklarata-e1561035071910.jpg
eri Ida13:59 | 10/02/2020

Presidenti i Republikës Ilir Meta kiëtë të hënë ka bërë me dije se po ndjek nga afër të gjitha zhvillimet në Luginën e Preshevës e në mënyrë të veçantë zhvillimet politike lidhur me zgjedhjet e ardhshme në Serbi.

Kreu i shtetit shqiptar ka bërë thirrje që në vijimësi për zgjidhjen në mënyrë demokratike të të gjitha çështjeve që shqetësojnë popullsinë shqiptare të Luginës dhe të gjithë shqiptarët në Serbi. Në këtë kontekst, pjesëmarrja në zgjedhje, si ato të përgjithshme, ashtu dhe lokale, është me rëndësi madhore.

Ndër të tjera në reagimin e tij për mediat thuhet se presidenti Meta do të inkurajojë të gjitha forcat politike të Luginës së Preshevës dhe të gjithë popullsinë shqiptare kudo ku jeton në Serbi, të marrin pjesë në zgjedhje, të unifikojnë qëndrimet, në mënyrë që të maksimalizojnë rolin dhe kontributin e tyre në institucionet e ardhshme, si në nivel qëndror, ashtu edhe në nivel lokal.

Gjithashtu Meta shpreh bindjen se pjesëmarrja sa më masive e shqiptarëve në zgjedhjet e përgjithshme dhe ato vendore, bashkëpunimi i të gjithë subjekteve politike për rritjen e përfaqësimit të shqiptarëve, si dhe bashkëpunimi i tyre i ngushtë me faktorin ndërkombëtar do të garantojnë forcimin e zërit të popullsisë shqiptare në funksion të plotësimit të kërkesave dhe të drejtave të tyre legjitime në Serbi./abcnews.al

fshat.jpg
ad min19:59 | 03/02/2019

Fshati Leran i Preshevës është një vend ku serbët dhe shqiptarët jetojnë bashkë si fqinj, ndajnë veglat e punës dhe gjithashtu fatin e tyre. Kur vjen fjala tek çështja e Kosovës, ata thonë se më shumë se sa zgjidhja i shqetëson vëmendja e institucioneve që deri më sot rezulton e munguar.

 

Ky është Korridori i Dhjetë, një trase e rëndësishme transporti për Evropën. Shqiptarët që jetojnë në pjesën që mund të ngelet në Serbi, thonë se kushtet për jetesë janë të vështira. Në fshatin Leran, ku shqiptarë e serb jetojnë bashkë, familja Mehmeti punojnë në bujqësi nga të rinjët deri tek gjyshi. Ndihma nuk kanë dhe subvencione për punë nuk marrin. Nëse shkëmbëhen, siç thonë, ose të gjithë ose askush pasi njerëzit i braktisin pronat.

Burhan Mehmeti: Këmbimi kur të jetë këmbim le të bëhet për krejt jo veç për dikë po e dikë jo. Ne komunë nuk kemi këtu, komunë kemi Preshevën. E ku do bëjmë në komunën? Këto duhet krejt me i lënë dhe me shku diku. Me i shit s’ka kush i blen.

Serbët këtu fillimisht nuk duan të flasin lehtë. Edhe ata si bashkëfshatarët shqiptarë kanë ikur, në fshat rrinë ata që nuk kanë shumë zgjidhje. Kryefjala e përbashkët etknike e problemit këtu është varfëria. Belgëzim Kamberi, aktivist për të drejtat e njeriut, thotë se Lugina e Preshevës, ka patur gati aspak investime. Kurse të drejtat e shqiptarëve janë trajtuar si problem i brendshëm i Serbisë pavarësisht se në jetën e këtushme problemet Kosovë-Serbi u kanë kushtuar. Në çfarëdo platofme ata duhet të përmenden në marrëveshjen përfundimtare.

Belgëzim Kamberi: Lugina e Preshevës është përjashtuar dhe problemet veçse janë rritur dhe nuk kemi pasur zgjidhje, por në rastin më të keq kemi pasur migrim të popullatës, qoftë të shqiptarëve apo të serbëve. Në këtë rast është jashtëzakonisht e rëndësishme që pavarësisht pranisë fizike apo jo të përfaqësuesve të Luginës së Preshevës në dialog, tema e çështjes së Luginës së Preshevës duhet të jetë në dialog.

Pasdite në fshat. Para dyqanit dhe kafenesë së lagjes rrinë bashkë. Aty arrinë Predrag Trajkoviç, i punësuar herën e fundit në vitin 2003. Tani edhe ai rri me duar në xhepa. Për shqiptarët betohet se nuk ka patur asnjëherë probleme.

Predrag Trajkoviç: Nuk kam frikë sido që të vendoset pasi nuk i kam borxh askujt. Nuk duhet të vuajnë as shqiptarët, as ne. Ata nuk më pengojnë e as unë ata. Këto janë marrëzira, ne duam të jetojmë.

Pas fitimit të besimit, Predrag, insiston të na tregoj një lagje në brendësi për ilustrim. Tomisllav jeton këtu me bashkëshorten, Sllavkën. Fëmijët janë larguar dhe pensionin e kanë rreth 80 euro. Të sëmurë, thonë se nuk kanë as për bukë. Në shtëpi gjithcka kundërmon si një gjë e harruar me shekuj. Banorët e këtij fshati të entuziazmuar për të treguar historinë e tyre, thonë se është në rregull që politika ta zgjidhë problemin, por para kësaj ftojnë liderët të vijnë në këtë fshat pasi kanë shumë porosi t’ua thonë në fytyrë./abcnews.al

Presheve-1280x704.jpg
ent ela21:11 | 02/02/2019

Në një kohë kur vëmendja është përqendruar tek taksa që qeveria e Kosovës ka vendosur ndaj Serbisë, një pjesë e shqiptarëve të Luginës së Preshevës në Serbi, shpresojnë se zgjidhja do të përfshijë edhe problemin e tyre pasi në shtetin ku jetojnë nuk ndjehen të integruar.

Kështu është edhe histoaria e një fshati ku në  një lagje, një rrugë ndanë tokat e banorëve në Kosovë dhe Serbi. Ata jetojnë afër bazave ushtarake në kushte të vështira dhe cdo ditë nga oborret e tyre shohin përtej kufirit.  Jetën e bëjnë si qytetarë të Serbisë, por prehen në paqe në Kosovë pasi varrezat i kanë andej kufirit.

Rruga për në fshatin Debcë të Karadakut të Preshevës. Në këto lagje dikur kanë jetuar qindra familje. Gjatë luftës së Kosovës shumë janë shpërngulur, një pjesë e tyre janë kthyer dhe jetojnë aty.

Të kthyer me fytyrë nga Gjilani i Kosovës.

Zeqirija Rashiti, është një nga banorët që bashkë me disa familje jetojnë në linjën kufitare. Me bagëti dhe në egërsinë e motit e shkrepave të malit shpresat ua kanë nxitur komentet e politikës nga Prishtina për bashkëim me Kosovën. Trojet e tyre nuk I braktisin dhe luten që një marrëveshje politikë Serbi-Kosovë të nis akrepat e orës së ndaluar për ta.

Presheva është vendbanimi me numërin më të madh të shqiptarëve në Serbi. Dyqane, lokale shërbyese dhe pak prodhim ndodh në këtë vend. Ata shpesh kanë qenë peng i politikave larg dhe afër tyre. Një pjesë këtu kthehen vetëm në verë nga Perëndimi pasi kush ka rastin e braktisë këtë zonë.

Në Kuvendin Komunal të Preshevës, thonë se ekziston shumë paqartësi për atë që do të ndodh. Papunësia shkon tek 70 për qind.

Sami Salihu, kryesues i parlamentit lokal, thotë se shqiptarët duan bashkim, por ajo që dihet tani është e vakët. Shqiptarët këtu nuk e ndjejnë vetën si pjesë të Serbisë.

Në fshatin Debcë ku gjithçka duket e ndarë, rruga i ndanë Kosovën dhe Serbinë. Këtu edhe fqinjët gjysma janë nga Kosova e gjysma nga Serbia, pavarësisht se ndodhen në një lagje. Tokën dhe adresat nuk i ndryshojnë dot, por shpresojnë se mund ta ndryshojnë fatin e tyre.

Derisa politika të dakordohet në Bruksel, banorët e Debcës që të vetmin element nga civilizimi kanë energjinë elektrike, duan një jetë më të mirë për fëmijët e tyre, e nëse jo të paktën një rrugë me asfalt./abcnews.al

sesel.jpg
ad min22:59 | 17/10/2018

Teksa presidenti i Kosoves ka hedhur idenë e rishikimit të kufirit me Serbinë, duke përfshirë brenda territorit të Kosovës është luginën e Preshevës, Kryetari i Partisë Radikale serbe Vojislav Sheshel ka deklaruar se do të blejë një shtëpi në qendër të Preshevës. Lajmi është shpërndarë menjëherë nga mediat serbe.

I ftuar në emisionin e mëngjesit të televizionit serb “Happy”. Kryetari i Partisë Radikale serbe, Vojislav Sheshel, deklaroi se ka në plan të blejë një shtëpi në qendër të Preshevës.

“Kam ndërmend të blej një shtëpi në qendër të Preshevës dhe nuk ka asnjë mënyrë që dikush të mund të më ndalojë! Do të ishte një kaos! Takimi im i parë me shqiptarët ishte me ata që prisnin dru, ku jetova, ata ishin njerëz të mirë. Kosova në përgjithësi mbetet në Serbi, është autonomia që mund të jetë një nivel më i lartë. Katër komunat serbe nuk janë vënë në dyshim. Ekziston një pronë homogjene serbe, përfshirë Gazivodën. Kopaonik është i mbrojtur, Trepça nuk është e mbrojtur tërësisht. Manastiret serbe, kishat dhe kishat janë shumë të rëndësishme. Komuna e Shtërpcës duhet të mbrohet në të gjitha mënyrat. Presheva, Bujanoci dhe Medvegja… as që mund të diskutohet për to”.

Mediat serbe kanë shpërndarë menjëherë lajmin, ndërsa titujt kryesorë sidomos të agjencive serbe të lajmeve online shkruanin: Shesheli kërkon shtëpi në qëndër të Preshevës: Shqiptarë, Vojvoda po vjen! Si dhe: Shesheli blen një shtëpi në qendër të Preshevës dhe kjo eshte porosia per shqiptarët!/abcnews.al

stefanoviccc.jpg
ad min17:42 | 10/09/2018

Reagime të ashpra në Beograd pas ftesës që zyrtarë të Luginës së Preshevës i bënë presidentit të Kosovës, Hashim Thaçi, për të vizituar jugun e Serbisë. Ministri i Brendshëm serb, Stefanoviç, u shpreh se ka ende një fletëarresti në fuqi për Thaçin në territorin serb.

Kryetari i Kuvendit të Preshevës, ka ftuar nëpërmjet rrjetit Facebook presidentin e Kosovës, Hashim Thaçi, që të vijë për vizitë në këtë qytet në jug të Serbisë. Kjo nuk ka shkaktuar mikëpritje edhe në Beograd. Derisa liderët e Luginës së Preshevës patën takim tek presidenti në Prishtinë, ministri i Punëve të Brendshme i Serbisë, në pyetjen e gazetarëve nëse do të sillej Beogradi në mënyrë diplomatike apo do të rrespektonte aktakuzën ndaj, Hashim Thaçit në gjyqet serbe u përgjigj qartë.

Nebojsha Stefanoviç, ministër i Brendshëm: “Republika e Serbisë është vend ku mbizotëron ligji. Ne kemi fletarreste nga gjykatat tona dhe natyrisht Ministria e Punëve të Brendshme dhe organet tona gjithmonë do të veprojnë në bazë të këtyre kërkesave. Nuk ka çfarë të shtohet”.

Shqiptarët e Luginës së Preshevës janë entuziazmuar nga mundësia për bashkim, por njëkohësisht kanë edhe frikë.

Stefanoviç, njëkohësisht kritikoi Kosovën dhe tha se protestat në Drenicë, kundër presidentit serb, ishin organizuar nga autoritetet e Kosovës, pavarësisht se nuk ka dëshmi.

Nebojsha Stefanoviç: “Provokimet janë të qarta edhe nga sjellja e Policisë së Kosovës edhe nga protestat dhe gjithë aparati i sigurisë është e qartë se kanë tentuar të organizojnë ndalesën e presidentit Vuçiç. Pas shkuarjes në Gazivodë kanë tentuar në çdo mënyrë ta ndalojnë presidentin. Kjo është një dhunë brutale kundër lirisë së lëvizjes ndaj serbëve që jetojnë aty”.

Një nga arsyet e përmendura për mostakimin e dy presidentëve gjatë dialogut në Bruksel ka qenë edhe çëshjta e Luginës së Preshevës pasi për Serbinë kjo është temë e mbyllur./abcnews.al

IDRO-FEMIJET-PRESHEVE.mpg_snapshot_00.51-1280x720.jpg
ad min13:40 | 04/09/2018

Edhe këtë vit fëmijët shqiptarë në Luginën e Preshevës e kanë nisur vitin e ri shkollor pa tekste mësimore në një kohë që ata s’lejohen të përdorin libra që vijnë nga Kosova.

Fëmijët shqiptarë në Luginën e Preshevës çdo vit mësimin e fillojnë pa tekste mësimore nëpër shkollat e tyre. Librat nga Kosova janë të ndaluara. Një proces ka filluar në bashkëpunim në mes të Tiranës dhe Beogradit për përdorimin e librave që janë në Shqipëri, por ato i nënshtrohen një sistemi të miratimit nga Ministria e Arsimit në Serbi. Fëmijëve u dhurohen libra nga institucionet, por atyre me etni shqiptare zakonisht vetëm çanta.

Dita e parë e shkollës si një kujtim i paharrueshëm. Nxënësit shqiptarë në Serbi marrin dhuratë çanta, por pa libra. Në shumë njësi mësimore udha e shkronjave për ta zgjatë ende. Në shkollën “Ibrahim Kelmendi”, mësuesi Lulëzim Mehmeti metodën e mësimit e ka më keq se në fillim të karrierës.

Lulëzim Mehmeti, Mësues: “Tani është shumë më e vështirë se atëherë sepse tani na mungojnë shumë tekstet shkollore të nxënësve si: historia, kultura muzikore, gjeografia, natyra dhe shoqëria edhe disa lëndë të tjera ku kryesisht ne arsimtarët japim shënime aty ku gjindemi.”

Përfaqësuesi i qeverisë së Serbisë, Zoran Stankovic, ka arritur këtu për tu dhënë kurajo. Problemi politik i ka lënë nxënësit pa mundësi. Nga Shqipëria procedurat janë zgjatur, kurse nga Kosova librat nuk lejohen. Në Shkollën fillore Vuk Karaxhiç, nxënësit serbë dhuratat i kanë të plota.

Zoran Stankoviç, përfaqësues i qeverisë serbe: “Nxënësit e fillojnë mësimin me 5 libra të rinj dhe presim 8 të tjera. Një numër tjetër është në fazë të bisedimeve mes Këshillit Kombëtar Shqiptar dhe Ministrisë së Arsimit. Bëhet fjalë për libra nga Shqipëria”.

Vite më parë policia pati konfiskuar librat që konsideroheshin ilegale edhe nga duart e fëmijëve. Shqiptarët ende nuk i kanë shumë libra.

Armend Aliu, nënkryetar i Bashkisë Preshevë: “Numri i teksteve që është premtuar se do të bëhet gati për nxënësit tanë nuk është ai i cili është premtuar. Kemi arritur që të sigurojmë vetëm 5 tekste në gjuhën shqipe, punojmë që edhe një muaj të sigurohen edhe 8 tekste të tjera. Ky nuk është numri i cili ishte programuar në shkurt të këtij viti ku është thënë se 48 tekste shkollore në gjuhen shqipe do të bëhen gati. Është logjike që ditën e parë të shkollës pushteti lokal duhet t’ja urojë nxënësve edhe me këtë brengën që ky problem po zbvarritet edhe nuk po zgjidhet.”

Për një kohë të gjatë, nxënësit në abetare kanë qenë peng të shkronjes F dhe dyshimit ta mësojnë flamurin shqiptar apo serb./abcnews.al

PRESHEVA-KUFIRI-IDRO.mpg_snapshot_00.57-1280x720.jpg
ad min12:10 | 03/09/2018

Liderët e Luginës së Preshevës dhe qytetarët që jetojnë në zonën jugore të Serbisë në kufirin me Maqedoninë prej vitesh kërkojnë tu hapet një pikë kalimi kufitar pasi në të dyja anët jetojnë familje që i ndanë kufiri. Ata ndonjëherë presin për orë të tëra pavarësisht se ekziston rruga që lidh dy fshatra. Mijëra prej tyre kanë ikur ndër vite si emigrant. Nën ethet e mundësisë së shkëmbimit të territoreve shpresojnë për zgjidhje ose jetë më të mirë.

Trekëndëshi Kosovë, Maqedoni Serbi -fshati Miratoc i Preshevës. Këtu jetojnë mijëra shqiptarë. Në anën tjetër në fshatin Llojan në Maqedoni po ashtu. Kufiri është mbyllur prej vitesh. Tani ata janë nën ethet e ndryshimit të kufijve. Këtu kanë kaluar shumica e refugjatëve në rrugën e Ballkanit nga Siria, por banorët shkojnë në zonë kufitare zyrtare pasi kufiri lokal nuk është vendosur më. Zejnullah Haliti, është nga shumica e fshatit që kufiri i ndanë me familjet. Një kilometër e gjysmë i ndan.

Zejnullah Haliti, banor i fshatit Miratoc, Preshevë: “Bashkëshorten e kam prej Llajanit, nënën e kam prej Llajanit. Ne bëhemi 73 kilometra përmes fshatit Miratoc për me shku në Llajan. E hmbin ditën rreth kufirit. 1 orë, 2 orë bëhemi në kufi duke pritur”.

Pikën kufitare Tobanoc në Preshevë me Maqedoninë e zgjodhen kryeministri maqedonas, Zoran Zaev, e presidenti serb, Alleksandar Vuçiç për tu takuar bashkë në mënyrë që të flasin për marrëdhëniet e tyre. Shqiptarëve këtu u është premtuar tu hapet një kufi prej vitesh. Papunësia është e madhe dhe bashkë me të edhe emigracioni.

“Papunësia e madhe. Janë detyru, të rinjtë sidomos, me ik në kurbet. Në qoftë se dalin nga fusha tek zona për të shiku duhet që të jesh i pajisur me dokumenta. Rreptësisht me i pas sepse kemi policinë, xhandamërinë pa marrë parasysh tek zona kufitare fort jena ndalu.”

Shpresojnë se do të jenë bashkë me Kosovën apo të paktën tu hapen kufijtë dhe mundësitë./abcnews.al

zaev-dhe-vucic.jpg
ad min18:17 | 02/09/2018

Shkup-Beograd marrëdhëniet ishin tensionuar deri tek tërheqja e tërë ambasadës serbe vitin që shkoi. Në simbolikën e kufijëve, në pikalimin afër Preshevës, janë takuar presidenti serb, Aleksandër Vuçiç dhe kryeministri maqedonas, Zoran Zaev.

Dy popuj të afërt, me interesa të ngjashme, janë konsideruar serbët e maqedonasit. Në pjesën që është përfolur për shkëmbim territoresh, Luginën e Preshevës, Vucic u irritua nga një pyetje e gazetarëve francezë dhe tha se vështirë beson se zgjidhja do të ndodh për Kosovën.

Aleksandër Vuçiç, President i Serbisë:Nuk e di nëse do ta na lejoni që të zgjidhim problemin mes shqiptarëve dhe serbëve që është konflikt më shumë se prej 200 vitesh. Unë shpresoj se po edhe pse nuk jam optimist. Zgjidhja e konflikteve në mes të shqiptarëve dhe serbëve është kontributi më i madh për stabilitetin në rajon. Kemi shikim të ndryshëm se ku janë kufijtë”. 

Kryeministri Zaev, tha se përkrah një zgjidhje të çështjes së Kosovës.

Zoran Zaev, Kryeministër i Maqedonisë:Maqedonia ka mbështetur një zgjidhje pozitive për të gjithë qytetarët që jetojnë në Kosovë, duke garantuar një paqe të përgjithshëm dhe siguri. Një progres edhe për Serbinë dhe Kosovën dhe të gjithë ne. Është detyre e jona si lider dhe të gjithë në rajon duhet të bien dakord për të krijuar një të ardhme drejt Bashkimit Evropian, bashkëpunim rajonal dhe një paqe të përhershme”.

Serbia dhe Maqedonia, së shpejti do të afrojnë kufijtë në një projekt për të lehtësuar kalimin e qytetarëve në njërën prej traseve më të shkelura të Ballkanit. /abcnews.al

SERBIA-AVIONET-1280x720.jpg
ent ela18:08 | 05/08/2018

Një ditë pas skadimit të afatit për krijimin e Shoqatës së Komunave Serbe në Kosovë, Beogradi zyrtar ka njoftuar nisjen e një stërvitjeje të forcave ajrore, që do të përfshijë mes të tjerash jugun e Serbisë. Ndërkohë, zyrtari serb Marko Gjuriç ka deklaruar se shteti serb do të mbrojë interesat e tij në Kosovë.

Qeveria serbe ka bërë me dije se ditën e hënë do të nisë stërvitjen e forcave ajrore në rajonin e Nishit dhe në jug të vendit, ku ndodhet dhe popullsia shqiptare. Në njoftimin e tij Beogradi zyrtar ka bërë me dije se bëhet fjalë për një stërvitje të rregullt, që do të zgjasë deri më 10 gusht. Sidoqoftë, njoftimi vjen në një ditë kur autoritetet serbe, ato kosovare dhe ndërkombëtare i druhen një përshkallëzimi të tensioneve në veri të Kosovës për shkak të skadimit të afatit për krijimin e Shoqatës së Komunave Serbe. Drejtori i Zyrës serbe për Kosovën, Marko Gjuriç ka deklaruar të dielën se Serbia do të mbrojë interesat e saj në Kosovë. “Dua t’i porosis të gjithë se Serbia do të mbrojë Trepçën, hidrocentralin në Ujman dhe nënstacionin në Valaçi. Për këtë nuk ka asnjë dyshim, pasi ai që prek Trepçën shkatërron themelet e ekzistencës së popullit serb në Kosovë”, ka deklaruar Gjuriç. Hidrocentrali i Ujmanit, i përmendur nga Gjuriç, ndodhet në komunën e Zubin Potokut, ku në ditët e fundit ka patur një prani të theksuar të trupave të KFOR-it. Sa i takon Trepçës, miniera e pasur ndodhet në veri të Kosovës, zonë e përfolur se do të jetë subjekt i shkëmbimit të territoreve mes Prishtinës dhe Beogradit, në këmbim të Luginës së Preshevës. Më herët gjatë së dielës presidenti Hashim Thaçi përjashtoi dhënien apo shkëmbimin e territoreve, duke ritheksuar se do të ketë vetëm korrigjim të kufijve. /abcnews.al

talat-xhaferri.jpg
ad min21:20 | 24/05/2018

Kryetari i parlamentit të Maqedonisë, Talat Xhaferri, në përfundim të vizitës në Serbi u ndal edhe në Preshevë, ku premtoi angazhim për çeljen e një pike të re kufitare.

Shqiptarët e Serbisë dhe ata të Maqedonisë i lidh dhe ndanë një kufi. Prej kohësh janë duke u munduar të hapin një pikë kufitare për të lidhur familjet, por edhe dy shtete.

Kreu i parlamentit maqedonas, Talat Xhaferri, në kthim nga kryeqyteti serb ka ndaluar në Preshevë për të diskutuar dhe mbështetur shqiptarët.

Shqiprim Arifi, Kryetar i Preshevës: “Ne jemi shumë të nderuar sepse nuk është vetëm kryetari i parlamentit, por është edhe miku jonë, është vëllau jonë”.

Preshevarët u ndanë me shpresë se progresi i shqiptarëve të Maqedonisë është një shembull edhe për ta.

Xhaferri u ka premtuar angazhim në takimet shtetërore për hapjen e një pike të re kufitare.

Talat Xhaferi, kryetar i Kuvendit të Maqedonisë: “Pozita jonë këtu nuk është pozitë sikundër dikush tjetër ka në atë kuptim, për faktin që janë trojet tona dhe në të cilën gjithnjë i kemi jetuar dhe ato të drejta që janë të garantuara natyrshëm janë çështje tpër të cilat përpjekjet duhet të vazhdojnë që të realizohen deri në fund”.

Kreu i parlamentit në Shkup tha se bashkëpunimi rajonal mund të zgjidh shumë probleme të hapura në Ballkan.

Gazetar: Idro Seferi

/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono