Parlamenti i Estonisë miratoi sot një ligj për legalizimin e martesave mes të njëjtës gjini, duke u bërë vendi i parë në Evropën Qendrore.
Martesa e të njëjtit seks është e ligjshme në pjesën më të madhe të Evropës Perëndimore, por jo në vendet e Evropës Qendrore, të cilat dikur ishin nën sundimin komunist dhe ishin anëtarë të aleancës së Traktatit të Varshavës të udhëhequr nga Moska, por tani janë anëtarë të NATO-s dhe në shumicën e tyre në BE.
“Mesazhi im (për Evropën Qendrore) është se kjo është një betejë e vështirë, por martesa dhe dashuria janë diçka që dikush duhet të promovojë”, tha kryeministrja Kaja Kallas për Reuters pas votimit. “Ne kemi evoluar shumë në 30 vitet që kur u çliruam nga pushtimi sovjetik. Jemi të barabartë mes vendeve me të njëjtat vlera”.
Projektligji u miratua me 55 vota në parlamentin me 101 vende, nga aleanca e partive liberale dhe socialdemokrate që Kallas ka bashkuar pas fitores së saj të fortë në zgjedhjet e 2023. Ndërkohë, ligji do të zbatohet nga viti 2024..
Megjithatë, 38% e estonezëve ende e konsiderojnë homoseksualitetin të papranueshëm. Martesa e të njëjtit seks kundërshtohet nga pakica etnike ruse, e cila përbën një të katërtën e qytetarëve, me vetëm 40% të atyre qytetarëve në favor./abcnews.al
