Presidenti turk Rexhep Tajip Erdogan ka bërë thirrje për heqjen e sanksioneve amerikane që bllokojnë prokurimin e mbrojtjes të vendit të tij dhe masat e tjera të marra “në mënyrë të njëanshme” dhe që pengojnë aftësinë e aleatëve të NATO-s për të arritur qëllimet afatgjata dypalëshe tregtare.
Gjatë vizitës së tij në Nju Jork, në kuadër të takimit të 79-të të Asamblesë së Përgjithshme të OKB-së, Recep Tayyip Erdogan mori pjesë në Konferencën e 15-të të Investimeve Turke, organizuar nga Këshilli i Biznesit Turko-Amerikan.
Presidenti Erdogan u tha biznesmenëve turq dhe amerikanë se bashkëpunimi në industrinë e mbrojtjes kishte rënie për shkak të kufizimeve të SHBA-së.
“Për fat të keq, bashkëpunimi ynë i industrisë së mbrojtjes ka rënë për shkak të kufizimeve të viteve të fundit.
Shpresojmë se kemi hapur një faqe të re me programin e modernizimit të F-16 dhe presim që barrierat e eksportit në këtë fushë të hiqen përgjithmonë”.
Ai përmendi si shembull bashkëpunimin me SHBA-në dhe dinamizmin e industrisë turke të mbrojtjes, prodhimin në Teksas nga një kompani turke për municione 155 mm, të cilat Shtetet e Bashkuara i eksportojnë në Ukrainë. “Mbështetja juaj është e rëndësishme për avancimin e programeve ekzistuese dhe krijimin e partneriteteve të reja që do të kontribuojnë në sigurinë tonë të përbashkët. Unë besoj se bota e biznesit amerikan mund të luajë një rol më efektiv në mbështetjen e përpjekjeve tona”, tha presidenti turk.
Ai bëri thirrje gjithashtu për t’i dhënë fund praktikave të njëanshme si tarifat shtesë për hekurin, çelikun dhe aluminin.
Blerja nga Ankaraja e sistemeve ruse të mbrojtjes ajrore S-400 bëri që SHBA të vendoste sanksione dhe tërheqjen e Turqisë nga programi i avionëve luftarakë F-35 në vitin 2019.
Megjithatë, Ankaraja dhe Uashingtoni kanë vendosur një objektiv afatgjatë për zhvillimin e tregtisë dypalëshe në 100 miliardë dollarë, nga rreth 30 miliardë dollarë në 2023.
/abcnews.al
