Në kuadër të operacionit policor të koduar “Gjurmimi”, kanë rënë në prangat e policisë dy shtetasit Agron Doçaj dhe Liridon Gjoka.
Mësohet se ata kultivonin farat e kanabisit dhe më pasi i shisnin.
Sakaq, raportohet se policia ka kapur 32-vjeçarin Gjoka me 1100 fara kanabisi në makinë, të cilat kishte si qëllim t’i shiste.
Njoftimi i policisë:
Operacioni, për goditjen e tentativave për sigurimin e farave të cannabisit, me qëllim kultivimin.
Sekuestrohen 1100 fara cannabisi, 1 armë gjahu, 20 fishekë, 2 radio si të Policisë dhe 1 automjet.
Arrestohet në flagrancë poseduesi i farave të cannabisit.
Në pranga dhe një shtetas tjetër që posedonte në banesë, 2 radio si të Policisë, 1 armë gjahu pa leje dhe municion luftarak.
Si rezultat i një hetimi proaktiv, të ndjekur për disa javë, në bashkëpunim me Prokurorinë e Shkodrës, shërbimet e Komisariatit të Policisë Shkodër kanë finalizuar operacionin policor të koduar “Gjurmimi”.
Si rezultat i këtij operacioni, në lagjen “Vasil Shanto”, u kapën në flagrancë dhe u vunë në pranga shtetasit 34 vjeç dhe 32 vjeç.
Nga kontrollet në automjetin që drejtonte 32-vjeçari dhe ku ishte pasagjer shtetasi shërbimet e Policisë gjetën 1100 fara cannabisi që posedoheshin nga drejtuesi i automjetit, me qëllim shitjen.
Në vijim të veprimeve, gjatë kontrollit në banesën e pasagjerit që ndodhej në automjetin ku u gjetën farat e cannabisit, Policia gjeti dhe sekuestroi 1 armë gjahu, 20 fishekë dhe 2 radio si të Policisë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme./abcnews.al
