Sonte zhvillohet El Clasico në “Santiago Bernabue”, duke nisur nga ora 21:00. Kjo përballje mbetet gjithmonë spektakolare dhe e zjarrtë, teksa sivjet është shumë e rëndësishme për titullin kampion. “Los Blancos” do të tentojnë fitoren për t’i marrë kreun katalanasve (Barcelon numëron dy pikë më shumë), teksa nuk fitojnë përballë Messit me shokë në shtëpi në kampionat prej rreth 5.5 viteve.
Kjo mund të jetë hera e fundit që kapiteni i skuadrës së Zidane luan në El Clasico. Flasim për Sergio Ramos që nuk po gjen akord me presidentin për të rinovuar kontratën. Aktualja i përfundon në verën e vitit 2021, teksa rinovimi është shumë larg. “A do të jetë kjo ndeshja e fundit e Ramos në El Clasico?“, shtron pyetjen Sport në versionin online.
Largimi i një prej mbrojtësve më të fortë në botë në fundin e këtij sezoni është shumë i mundshëm, gjithmonë nëse nuk vjen akordi. Real Madrid ka një politikë fikse me lojtarët në moshë, të cilëve u afron vetëm rinovime një-vjeçare. Ndryshe mendon 34-vjeçari (i mbush në fund të marsit) dhe ai kërkon të rinovojë për disa vite. E sigurt është që sonte do të japë maksimumin si gjithmonë me qëllimin për të ndalur miqtë, sidomos Leo Messin. /abcnews.al
