Dinamo rikthehet në Superiore pas disa vitesh dhe dëshiron të bëhet si e dikurshmja menjëherë. 18-herë kampionët janë një ndër klubet më të lëvizshëm në merkato dhe abcnews.al mëson se janë shumë pranë dy afrimeve mjaft cilësore.
I pari është Goran Siljanovski. Ish-mbrojtësi i djathtë i Flamurtarit (2017-2019) ka vendosur të kthehet në Kategorinë Superiore. Ai ka arritur marrëveshjen me Dinamon dhe pritet vetëm zyrtarizimi nga ana e klubit. 31-vjeçari sezonin e fundit ishte pjesë e Rabotnicki në vendin fqinj.
Ai luajti 28 ndeshje në kampionat dhe shënoi 1 gol. Kryeqytetasit prej javësh po punojnë për të “blinduar” edhe anën tjetër të mbrojtjes. Në lojë është një tjetër maqedonas, Aleksandar Isaevki. 26-vjeçari sezonin e shkuar ishte pjesë e Vllaznisë. Akordi për të rinovuar nuk u gjet dhe palët vendosën për divorcin.
Dinamo është në negociata të avancuara me të dhe po tenton ta bindë. Ai nuk po negocion me Tiranën, siç është folur në mediet maqedonase. Në ditët në vijim mund ta kemi më të kristalizuar situatën e negociatave mes palëve. /abcnews.al
