Pas takimit me Federika Mogerinin, shefen e diplomacisë së Bashkimit Europian në Bruksel, Fatmir Limaj dhe Shpend Ahmeti njëzëri u shprehën se Kosova prezantoi kushtet e saj dhe se taksa ndaj Serbisë nuk do të hiqet.
Shefi i Ekipit Negociator, Fatmir Limaj foli për gazetarët në Bruksel pas përfundimit të takimit të palës kosovare me përfaqësuesit e lartë të Bashkimit Evropian, të drejtuar nga Federika Mogherini.
Limaj u shpreh se u diskutuan shumë çështje si liberalizimi i vizave, çështja e të pagjeturve, taksa… etj. Ai theksoi së marrëveshja përfundimtare me Serbinë duhet të ketë në thelb njohjen e pavarësisë së Kosovës.Sipas tij ky ishte një rast i mirë i prezantimit të vendit në dialog.
Sipas Limajt, çështja e taksës përfundimisht hiqet vetëm në rast se Serbia njeh Kosovën.
Nga ana e tij kryesuesi i delegacionit të Kosovës në bisedimet me Serbinë, Shpend Ahmeti ka treguar detaje të tjera nga bisedimet në Bruksel me Mogherinin. Ahmeti tha se delegacioni i Kosovës ka treguar qartë qëndrimet e Kosovës e që prioritet mbetet njohja reciproke e të dy shteteve.
Ndërkohë partia në opozitë Lidhja Demokratike e Kosovës, me anë të një deklarate për shtyp këmbënguli se nuk e pranon ekipin e Limajt dhe Ahmetit. Sipas kësaj partie vendi duhet të shkojë sa më parë në zgjedhje të jashtëzakonshme. /abcnews.al
