Dy të mitura të abuzuara në pak ditë, Xhixho: E tronditur, dorëzova në Kuvend projektligjin për Regjistrin e Krimeve Seksuale

schedule18:32 - 6 Nëntor, 2021

schedule 18:32 - 6 Nëntor, 2021

Nënkryetarja e Lëvizjes Socialiste Erisa Xhixho shprehet se ka mbetur e pafjalë nga dy rastet e abuzimit me të mitura që kanë ndodhur në pak ditë në vend.

Duke iu referuar rastit të vajzës 6-vjeçare në Tiranë që u dhunua nga i ati dhe rastit të 16-vjeçares në Gjirokastër që dyshohet të jetë përdhunuar prej vitesh nga xhaxhai i babait, Xhixho shprehet se ky realitet duhet ndryshuar.

Deputetja e LSI thotë se të premten ka dorëzuar në Kuvend projektligjin për Regjistrin e Krimeve Seksuale në bashkëpunim me CRCA/ECPAT Shqipëri. Miratimi i tij, shprehet Xhixho në një postim në llogarinë e saj në Facebook, zgjidh një herë e mirë regjistrimin abuzuesi dhe mbrojtjen e fëmijëve dhe grave nga dhuna seksuale.

ERISA XHIXHO NË FACEBOOK

E tronditur pas ngjarjeve ulëritese të fundit, dhunimit shtazor të vajzës 6-vjeçare nga i ati dhe përdhunimit që në moshën 12-vjeçare të një tjetër vajze në Jug të vendit nga një familjar mbi 50-vjeçar. E pafjalë si grua, e shokuar si nënë, por plot nerv për të bashkuar zërat, për ta ndryshuar këtë realitet.

🆘Raste të tilla, fatkeqësisht jo të izoluara duhen trajtuar siç duhet. Dhuna ndaj femijeve e grave sipas studimit 10-vjeçar të CRCA/ECPAT Shqipëri “Krimet Seksuale ndaj Fëmijëve dhe Grave në Shqipëri”, gjeti se të paktën 65 për qind e krimeve seksuale kryen ndaj fëmijëve, përgjithësisht fëmijë vajza.

Dje dorëzova në Kuvend 🏛projekt-ligjin për Regjistrin e Krimeve Seksuale ne bashkepunim me CRCA/ECPAT Shqipëri. Miratimi i tij zgjidh një herë e mirë regjistrimin e çdo grabitqari seksual dhe mbrojtjen e femijëve e grave nga dhuna seksuale!

📌Krijimin e Regjistrit Kombëtar për të Dënuarit për Krime Seksuale i cili duhet të jetë një instrument i shtetit shqiptar për të luftuar dhe parandaluar krimet seksuale.

📌Hartimi i këtij projektligji është diktuar nga nevoja për krijimin e një mekanizmi ligjor-institucional efektiv, parandalues për mbrojtjen e fëmijëve, të rinjve, grave dhe çdo viktime seksuale të mundshme nga grabitqarët seksualë.

📌Projekt-ligji ka për qëllim inkurajimin dhe përgatitjen e organeve kompetente shtetërore për të mbrojtur fëmijët, të rinjtë, gratë dhe çdo individ nga dhuna dhe shfrytëzimi seksual, vepra penale që prekin jo vetëm dinjitetin e individit, por edhe shkaktojnë pasoja të rënda në funksionimin normal të qenies njerëzore, duke siguruar që Regjistri të jetë një mjet efektiv për të identifikuar vendodhjen e të dënuarëve për krime seksuale dhe monitorimin i aktivitetit të tyre.

Ky eshte vetëm një hap i parë, që pret angazhimin e gjithë aktorëve të shoqërisë civile, qytetarët, median, kolegëve deputetë, akademikët. Të gjithë që mund të kontribuojnë me mendime sugjerime për të miratuar nje ligj që i shërben mbrojtjes së fëmijëve, grave nga dhunuesit seksualë.

📣Zëri ynë duhet sot, më i fortë se kurrë.  E nesëmja është vonë dhe nuk do na e falë heshtjen.