Karriget bosh në sallën e komisionit të ligjeve, i përkisnin opozitës.
Asnjë deputet i mazhorancës nuk mungoi në raportimin e institucionit që mund t’ju shkaktojë të dridhura të gjithë zyrtarëve abuzues apo kriminelëve të mëdhenj.
Kreu i SPAK-ut, jua bëri të qartë se karriget e pushtetit nuk mund ta pengojnë më drejtësinë.
“Ndikimi tek unë është zero, nuk ndodh. Qoftë kolegë prokurorë, gjyqtarë, të SPAK, GJKKO apo qoftë edhe politikanë që as nuk e marrin mundimin të më telefonojnë apo kërkojë takim, sepse e dinë përgjigjen”
Përballë rezervave të deputetëve që i kërkuan më shumë peshkaqenë në tavë, Altin Dumani ju kërkoi durim.
“Kemi raste, do ngremë akuzë ndaj zyrtarëve dhe ish-zyrtareve që kanë shkelur ligjin. Asnjë s’ka imunitet. Na lini kohë. Kemi në hetim disa cështje të rëndësishme dhe koha do të tregojë rezultatin e tyre”
Gjatë raportimit për performancën e vitit që lamë pas, shefi i SPAK-ut nënvizoi si sukses shtimin e pasurive të sekuestruara të krimit, teksa e përshkroi krimin shqiptar brenda e jashtë vendit si më të sofistikuar, që paratë i transferon në linja sekrete dhe i investon në parajsa fiskale, madje ka linja të drejtpërdrejta me Amerikën Latine për kokainën.
