Princi Harry dhe Dukesha Meghan Markle po presin fëmijën e tyre të parë. Lajmi është bërë i ditur zyrtarisht nga Pallati Mbretëror ne Londer. Foshnja mbretërore pritet të lindë në Pranverën e vitit 2019.
Lajmi u vendos të publikohej zyrtarisht pas dasmës së princeshës Eugenia, që u zhvillua disa ditë më parë, për të mos i marrë vëmendjen këtij eventi të rëndësishem të familjes mbretërore britanike. Gjatë shfaqjes së saj në këtë dasëm, Megan ra në sy me pamjen e saj, që nxiti diskutimet mbi një shtatzëni të mundshme të dukeshes. Dhe nuk vonoi shumë konfirmimi zyrtar nga Pallati mbretëror.
“Princi dhe Dukesha e Sussex janë aktualisht në Australi për turneun e tyre të parë mbretëror si çift i martuar”, thuhet në njoftimin e Pallatit Mbretëror.
Harry dhe Meghan kanë mbërritur sot në Sidney për vizitën e tyre 16-ditore në Australi, ishujt Fixhi, Tonga dhe në Zelandën e Re. Udhëtimi i tyre është i pari jashtë Britanisë së Madhe dhe Irlandës. Vizita do të fillojë zyrtarisht ditën e martë.
