Mbi 25 mijë persona kanë humbur jetën prej koronavirusit në Francë, teksa numri i njerëzve të prekur e ka kaluar shifrën 170 mijë. Situata është kritike dhe qeveria vendosi të pezullonte kampionatet e futbollit, duke lënë në fuqi renditjen aktuale.
PSG është një nga katër skuadrat që ka siguruar kalimin në çerekfinalet e Champions League, objektiv për të cilin garon edhe Lyon, që fitoi 1-0 ndeshjen e parë kundër Juventusit. Finalja e madhe e këtij kompeticioni do të zhvillohet në Stamboll, vend që mund të presë edhe duele të tjera.
“PSG do të luajë ndeshjet e Champions, ashtu si edhe Lyon. Për ndeshjet e tjera po mendohet si mund të organizohemi. Mund të ketë një ndeshje teke, ekziston një mundësi që gjysmëfinalet të luhen në Stamboll, ku do të luhet edhe finalja”, deklaron Armand Duka, kryetari i FSHF-së dhe anëtar i Komitetit Ekzekutiv, për Radio Kiss Kiss. /abcnews.al
