Mund të ketë pasur një reagim të ashpër nga deklaratat e Macron për dërgimin e trupave në Ukrainë, por Donald Tusk lëshoi gjithashtu një paralajmërim dramatik: “Evropa është tani në një epokë të re të paraluftës“.
“Kohët e qetësisë së lumtur kanë mbaruar. Epoka e pasluftës ka ikur. Jetojmë në kohë të reja, në epokën e paraluftës. Në fakt, për disa nga vëllezërit tanë nuk është më as paraluftë. Është një luftë në shkallë të plotë në formën e saj më mizore”, tha ai në konferencën e EPP në Bukuresht.
“Nuk është faji ynë që fjalori ynë i përditshëm përfshin, edhe një herë, fjalë si luftime, bombardime, sulme me raketa, gjenocid”, tha Donald Tusk, duke shtuar: “Evropa donte të jetonte dhe të zhvillohej në një botë të pasluftës. Por sot duhet të themi qartë se jemi përballë një zgjedhjeje të thjeshtë ose do të luftojmë për të mbrojtur kufijtë tanë, territorin tonë, autoritetet tona dhe rrjedhimisht qytetarët tanë dhe brezat e ardhshëm, ose do të rrëzohemi.
Nuk ka asnjë arsye objektive për të kapitulluar ndaj së keqes. Mundësitë e Evropës, ekonomike, financiare, demografike, morale janë më të mëdha se mundësitë e atyre që na sulmojnë. Është jetike sot që Evropa të besojë në forcën e saj.
Gjithashtu, kur bëhet fjalë për kuadrin e aftësive tona mbrojtëse, ne nuk mund të jetojmë nën iluzione. Askush nuk do të zërë vendin tonë në këtë luftë për sigurinë dhe të ardhmen tonë. Ne vetë jemi garantuesit më të mirë të sigurisë dhe unitetit tonë.
Siç e dini mirë, i vetmi person tek i cili mund të mbështeteni është vetvetja. Evropianët do të jenë të bashkuar kur të shohin me gjithë qartësi se Bashkimi është me të vërtetë Evropa jonë, një shtëpi e sigurt dhe e mirë për njerëzit”./abcnews.al
