Besir Demiri e ka fituar gjyqin me MSK Zilina, për shkak se sllovakët e ndërprenë kontratën me mbrojtësin e majtë pa arsye. E gjitha ndodhi gjatë pandemisë, teksa Zilina largoi shumë lojtarë me pretekstin se nuk i përballonte dot financiarisht.
Mes tyre ishte edhe Demiri, i cili përmes avokatëve të tij e çoi çështjen në FIFA dhe kjo e fundit i ka dhënë të drejtë mbrojtësit që është grumbulluar edhe nga kombëtarja shqiptare dhe tani luan në Superiore me fanellën e Kukësit.
Kërkesa e Demirit është pranuar pjesërisht dhe Zilina duhet të derdhë në llogarinë e mbrojtësit shumën e 180 mijë eurove, plus një interes prej 5 për qindësh nga qershori, kur edhe klubi sllovak duhet ta kishte paguar shqiptarin nga Maqedonia e Veriut.
Zilina, në rast se nuk e paguan Demirin brenda 45 ditësh dënohet me mbylljen e merkatos në tre sesione, ndërsa më pas mund të merren edhe penalizime të tjera nga Komiteti Disiplinor i FIFA-s. /abcnews.al
