Disa shkolla në Korçë janë mbyllur për shkak të temperaturave të ulëta, kurse në qytet orët janë reduktuar dhe mësimi nisi me vonesë. Por pavarësisht kësaj prindërit kanë kërkuar mbylljen e tyre deri në largimin e acarit.
E marta ka shënuar ditën më të ftohtë të dimrit në juglindje. Temperaturat zbriten në 14 gradë nën zero. Si pasojë e motit ekstrem, Drejtoria Arsimore ka vendosur mbylljen e shkollave në fshatrat Orman dhe Sheqeras, kurse në shkollat e tjera, mësimi u bë me orë të reduktura.
Kristaq Grabocka, Drejtor i Drejtorisë Rajonale të Arsimit: “Ne kemi vendosur që në gjithë qarkun e Korçës mësimi do fillojë në orën 9. Lënda ngrohëse nuk mungon”.
Ndjekja e procesit mësimor ka qenë e vështirë për nxënësit edhe pse shkollat kanë pasur ngrohje. Prindërit kërkuan mbylljen e shkollave gjatë ditëve te ftohta.
Nxënës të shkollës Sotir Gurra, Korçë: “Sot kam ardhur në orën 8 kam pasur shumë ftohtë. Kemi dy kaldaja, por klasa është e ftohtë”.
Prind: “E mira është t’i zëvendësojnë me të shtuna më vonë”.
Duke filluar nga e mërkura dhe deri të premte, mësimi në shkollat e juglindjes do të fillojë në orën 9:00. /abcnews.al
