Në Ditën Botërore të Lirisë së Shtypit Shtetet e Bashkuara ritheksojnë mbështetjen për gazetarët e pavarur. Në një deklaratë, ambasada amerikane në Tiranë më në ditur se kryediplomatja Yuri Kim është takuar me dy gazetarë shqiptarë.
Kim ka shprehur mbështetjen e palëkundur për gazetarët e pavarur dhe ka dënuar sulmet direkte dhe indirekte ndaj tyre.
Ambasadorja thekson se që lufta kundër korrupsionit të ketë sukses dhe pandëshkueshmëria të përfundojë, roli që ka një media e fortë dhe e pavarur është parësor.
“Në Ditën Botërore të Lirisë së Shtypit, Shtetet e Bashkuara ritheksojnë mbështetjen e tyre të palëkundur për gazetarët e pavarur të cilët përpiqen të zbulojnë dhe të përcjellin të vërtetën, të luajnë rolin e tyre mbikëqyrës në një mënyrë të përgjegjshme dhe të punojnë në një mjedis pa përndjekje, frikësime dhe vetëcensurë. Javën e kaluar, Ambasadorja Yuri Kim u takua me gazetarët Edmond Hoxhaj (BIRN Albania) dhe Isa Myzyraj (Ora News) për të shprehur mbështetjen e palëkundur për gazetarët e pavarur dhe për të dënuar sulmet direkte dhe indirekte ndaj gazetarëve të cilët kërkojnë të raportojnë në mënyrë të pavarur dhe të saktë. Që lufta kundër korrupsionit të ketë sukses dhe pandëshkueshmëria të përfundojë, roli që. ka një media e fortë dhe e pavarur është parësor”, shkruhet në deklaratën e ambasadës së SHBA në Tiranë. /abcnews.al
