Diplomati gjerman, Wolfgang Ischinger, në deklaratën e tij më të fundit ka kërkuar liberalizim e vizave për qytetarët e Kosovës.
Ischinger përmes një postimi në Twitter, shkruan se një gjë e tillë ishte premtuar nga Bashkimi Evropian, por vazhdon që të mos përmbushet. Ndër të tjera në reagimin e tij ai thekson se për shkak të vonesës në këtë proces, kredibiliteti i BE-së është vënë në diskutim, pasi dy vjet më parë Komisioni Evropian kishte konfirmuar se Kosova ka plotësuar kriteret për liberalizim.
“Ta bëjmë tani. Liberalizimi i vizave për të gjithë qytetarët e Kosovës është një premtim i paplotësuar i BE-së. Vonesë e gjatë – kredibiliteti i BE-së është në diskutim”, ka shkruar Ischinger.
Ischinger, në vitin 2007 ishte përfaqësues i BE-së në negociatat e Treshes për Kosovën, të cilat përfunduan duke çuar në shpalljen e pavarësisë në shkurt 2008./abcnews.al
