FUSHË KRUJË- Pak ditë pas dhunës makabre në Borizanë të Fushë-Krujës, autoritetet kanë vendosur të bllokojnë aktivitetin e subjektit të gurores “Delia Group”, në pronësi në Përparim Rrajës.
Ky vendim u mor pas inspektimit të bërë nga Policia e Shtetit në bashkëpunim me Agjencinë Kombëtare të Burimeve Natyrore (AKBN) dhe Autoriteti Kombëtar për Sigurinë dhe Emergjencat në Miniera (AKSEM).
Gjithashtu, u bë këqyrja ngab afër e nëntë banesave, të cilat dyshohet se janë dëmtuar nga aktiviteti i kësaj guroreje. Dy nga personat që ushtruan dhunë janë Xhelal dhe Përparim Rraja, vëllezër të deputetit Rrahman Rraja.
Me shkopinj e armë, bashkë me persona të tjerë, ata sulmuan kushërinjtë Bilbil dhe Jashar Maja. Ndaj tyre është goditur disa herë derisa njëri prej tyre Bilbil Maja humbi ndjenjat për shkak të dhunës fizike.
Kjo ngjarje solli shumë zhvillime të tjera. Kryeministri Edi Rama vendosi të shkarkojë nga detyra ministrin e Brendshëm Bledi Çuçin, ndërsa Rrahman Rraja hoqi dorë nga mandati i deputetit duke i bërë thirrje djalit të tij të dorëzohet. Deri tani janë arrestuar tetë persona për dhunën e ushtruar ndaj Bilbil dhe Jashar Maja.
Njoftimi i policisë:
Strukturat e Drejtorisë Vendore të Policisë Tiranë, të mbështetura nga strukturat e Drejtorisë së Përgithshme të Policisë së Shtetit, në bashkëpunim me Agjencinë Kombëtare të Burimeve Natyrore dhe Autoritetin Kombëtar për Sigurinë dhe Emergjencat në Miniera, ushtruan kontroll ne subjektin gurore “Delia Group”, me administrator shtetasin V. D., me vendndodhje rreth 300 metra mbi fshatin Borizanë, Njësia Administrative Thumanë, Bashkia Krujë.
Pas këqyrjes së sipërfaqjes ku kryhet aktiviteti i gurores, si dhe të dokumentacionit të saj, u vendos bllokimi i subjektit deri në përgatitjen e dokumentacionit dhe vlerësimit të tij, nga ana e AKBN dhe AKSEM.
Përveç kontrollit në këtë gurore u bë këqyrja e 9 (nëntë) banesave, të cilat dyshohet se janë dëmtuar nga aktiviteti i kësaj guroreje. Gjatë këqyrjes morën pjesë edhe specialistë të Agjencisë Kombetare të Burimeve Natyrore, të cilët bënë matjet për të përcaktuar distancën midis guroreve dhe banesave objekt këqyrje.
Aktet procedurale të përpiluara do të referohen në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, si pjesë e materialeve të referuara më parë, për ngjarjen e datës 02.05.2023./ n.m.abcnews.al
