Ka shkuar në 15 numri i viktimave nga sulmi i ditës së parë të vitit 2025 në New Orleans të Shteteve të Bashkuara.
Autori, i cili u vra më pas nga policia, ishte 42-vjeçari Shamsud Din Jabbar, një shtetas amerikan që dikur kishte shërbyer në Afganistan. Në momentin e sulmit, ai mbante në makinën që mori para turmën një flamur të shtetit islamik.
Nga sulmi u plagosën 35 të tjerë, mes tyre edhe dy policë nga të shtënat me armë që Jabbar hapi kur doli nga makina.
Policia gjeti armë dhe një mjet të mundshëm shpërthyes në automjet, ndërsa dy mjete të mundshme shpërthyese u gjetën në lagjen franceze dhe u çaktivizuan.
FBI tha në një deklaratë se Jabbar veproi i vetëm. Zyrtarë të informuar nga hetimet i thanë CNN se i dyshuari regjistroi video në të cilat ai përmendi ëndrrat për t’u bashkuar me ISIS dhe mendoi të vriste familjen e tij pas një divorci.
Të dhënat publike treguan se Jabbar punonte në pasuri të paluajtshme në Hjuston.
Jabbar ishte në ushtrinë e rregullt nga marsi 2007 deri në janar 2015 dhe më pas në Rezervën e Ushtrisë nga janari 2015 deri në korrik 2020, tha një zëdhënës i Ushtrisë. Ai u vendos në Afganistan nga shkurti 2009 deri në janar 2010 dhe mbajti gradën e rreshterit të shtabit në fund të shërbimit.
Rreth 400 oficerë ishin në detyrë në lagjen franceze në kohën e incidentit, duke përfshirë një numër që kishin vendosur një pengesë të improvizuar për të parandaluar këdo që shkonte në zonën e këmbësorëve.
Ngjarja u bë shkak edhe për shtyrjen e Sugar Bowl, loja e futbollit të kolegjeve që luhet në New Orleans ditën e parë të vitit të ri. Qyteti do të presë gjithashtu Super Bowl më 9 shkurt.
/abcnews.al/
