Atletico Madrid do të presë Real Madrid nesër në mbrëmje në një nga duelet më të bukura të La Ligas spanjolle. Diego Simeone e di mirë që këto përballje vendosen nga detajet dhe vlerëson ekipin kundërshtar e francezin Zidane.
“Këto lloj ndeshjesh përcaktohen nga detajet. Kam parë përmirësime të dukshme te Reali në ndeshjet e fundit kundër Sevillës dhe Osasunës. Ata kanë një skuadër të madhe dhe një trajner ‘top’ ”, thekson Diego Simeone.
Trajneri i “Atletiko Madrid” lëshon edhe një batutë për pyetjen e radhës, nëse do të preferonte fitimin e Champions League apo derbin me Realin. “Sigurisht që derbin, sepse kjo ndeshje luhet nesër. Është sfida jonë e radhës dhe nuk duam të na ikë nga duart”, përfundon Diego Simeone, i cili nuk do të ketë të gatshëm Alvaro Moratën për sfidën me “Los Blancos”, pas konfirmimit që Komisioni i Apelit i ka bërë kartonit të kuq të marrë kundër Mallorca. /abcnews.al
