Kukësi do të përballet me Vllazninë, takim që konsiderohet si “derbi” i veriut, që do të luhet ditën e nesërme në “Loro Boriçi” duke nisur nga ora 19:00.
Pas barazimit me Tiranën në “Kukës Arena” në sfidën hapëse të kampionatit, verilindorët ndaj shkodranëve do të kërkojnë 3 pikët e para.
Në konferencën për shtyp, trajneri Skënder Gega ka analizuar përballjen me kuqeblutë, teksa e ka cilësuar një sfidë të vështirë.
“Ndeshja me Tiranën: Është e vërtetë që vuajtëm në dy aspektet e lojës, u munduam që të jemi kompakt. Në fakt Tirana na vuri në vështirësi dhe kishte mundësi që ndeshja të shkonte ndryshe, por 1 pikë kundër ekipit kampion na kënaq. Do mundohemi të korrigjohemi në gabimet tona.
Vllaznia: Po përgatitemi shumë, siç është një javë nuk është java tjetër dhe ju garantoj që as Vllaznia nuk është ajo që u shfaq me Erzenin. Ka një potencial dhe tifozeri shumë të mirë, do të eliminojmë sa më pak gabimet, dhe të shfrytëzojmë formën e dobët të kundërshtarit.
Daci: Çuditërisht fola para ndeshjes që nuk duhet të marrim kartonë që na dëmtojnë. Por mosha e re dhe emocionet e ngatërrojnë pak atë pjesën për të bërë “fair play”.
Merkato: Besoj që nuk ka sekrete po mundohemi jemi në kontakt me dy lojtarë, por dhe këto që janë do përpiqemi shume t’u japim besimin e plotë. Është çështje e klubit pasi është një ndërmarrje por në qoftë se vjen një lojtar që bën diferencën është i mirëpritur”.
