Pas Sekretarit Amerikan Antony Blinken edhe Departamenti Amerikan i Shtetit përmes një komunikatë zyrtare për media dënoi veprimet e Qeverisë Kurti për të hyrë me forcë në ndërtesat e komunave në veri të Kosovës.
Departamenti Amerikan i Shtetit thotë se veprime të tilla të Kosovës janë ndërmarrë kundër këshillave të SHBA-së dhe BE-së. Sipas tyre, akte të tilla të kenë pasoja për marrëdhëniet dypalëshe me SHBA- Kosovë.
Po ashtu, në reagimin e DASH-it thuhet se veprime të tilla kanë përshkallëzuar në mënyrë të ashpër dhe të panevojshme tensionet në veri të vendit duke minuar përpjekjen e SHBA-së për të ndihmuar procesin dhe theksojnë se veprimet e sotme do të kenë pasoja të pariparueshme në raportet mes SHBA-së dhe Kosovës.
“Shtetet e Bashkuara të Amerikës dënojnë ashpër veprimet e Qeverisë së Kosovës për të hyrë me forcë në ndërtesat komunale në veri të Kosovës, veprime që ajo ndërmori kundër këshillave të Shteteve të Bashkuara dhe partnerëve evropianë të Kosovës. Këto veprime kanë përshkallëzuar në mënyrë të ashpër dhe të panevojshme tensionet, duke minuar përpjekjet tona për të ndihmuar në normalizimin e marrëdhënieve ndërmjet Kosovës dhe Serbisë dhe do të kenë pasoja për marrëdhëniet tona dypalëshe me Kosovën. I bëjmë thirrje kryeministrit Albin Kurti që të ndryshojë kursin dhe të gjitha palët të përmbahen nga çdo veprim i mëtejshëm që do të ndezë tensionet dhe do të nxisë konfliktin”, thuhet në reagimin e Departamentit Amerikan të Shtetit.
