Matthijs De Ligt zhvilloi një sezon super me Ajaksin, por nuk po arrin të konfirmojë veten te Juventusi. Futbolli italian është specifik dhe holandezi po përshtatet, por gafat e kryera kanë mërzitur shumë tifozë.
Gianni Mura është një gazetar dhe shkrimtar i njohur në Itali. Ai ka bërë një krahasim interesant mes mbrojtësit të Juves dhe Marash Kumbullës.
19-vjeçari shqiptar është surpriza e bukur e Veronës në këtë fillim sezoni. Mura preferon Kumbullën përpara De Ligt dhe e analizon në këtë mënyrë mendimin e tij për La Reppubblica.
“Te Juventusi nuk e kemi parë akoma De Ligt-in e Ajaksit. Të shohim në të ardhmen, por tani nuk po ndodh diçka e tillë. Shpresoj të mos skandalizoj askënd me krahasimin që do të bëj: Kumbulla po luan më mirë se De Ligt, është edhe 6 muaj më i ri. Dikush mund të thotë: ‘Ka diferencë të madhe aktivizimi me Juventusin dhe me Veronën’. Verona e ka rritur vetë Kumbullën dhe nuk ka shpenzuar asnjë euro, ndërsa Juventusi pagoi 75 milionë euro për holandezin“, përfundon Gianni Mura. /abcnews.al
