Ish-futbollisti i Manchester United, tashmë analist në SkySport, Gary Neville, ka dhënë mendimin e tij se kush duhet të jetë portier i parë te “Djajtë e Kuq”, De Gea apo Henderson, me këtë të fundit që shkëlqeu te Sheffield United sezonin e shkuar si i huazuar.
“De Gea e fillon sezonin e ri si numri një. Ishte një moment ku Solskjaer mund ta ulte atë në stol, në fund të sezonit të kaluar. Sidoqoftë, trajneri e mbështeti në momentet e gabimeve dhe tani jemi vetëm rreth katër javë më vonë. Unë mendoj se Henderson ka ende shumë për të provuar.
Të luash në portë për Sheffield United është shumë më ndryshe sesa ta bësh këtë në “Old Trafford”, kur ekipi orvatet gjithnjë në anën tjetër të fushës. Manchester United është pjesën më të madhe të kohës duke sulmuar, nuk e rreshton pjesën më të madhe të lojtarëve para portierit.
Prandaj, unë mendoj se është një realitet krejt i ndryshëm për henderson. Nuk është e thënë se ai do të shkojë në një ekip si Manchester United dhe do të jetë titullar.
Ai nuk e ka përvojën akoma për ta trajtuar presionin në “Old Trafford”. Shpresojmë të tregojë potencialin që ka, por ky është pozicioni më i vështirë në një fushë futbolli.
Besoj se ka një rrugë të gjatë përpara, për t’u rritur dhe fituar eksperiencë. Unë mendoj se pozicioni i portierit të Manchester United, dhe do ta argumentoja, është një nga pozicionet më me presion në futbollin anglez”, u shpreh Neville./abcnews.al
